Rossiya Sog‘liqni saqlash vazirligi shifokorlarga koronavirus haqida jamoatchilikka gapirishni taqiqladi

Rossiya Sog‘liqni saqlash vazirligi unga bo‘ysunuvchi shifokorlar va tibbiyot muassasalariga yangi koronavirus infeksiyasi bo‘yicha jamoatchilikka beriladigan har qanday bayonotni muvofiqlashtirish to‘g‘risida ko‘rsatma yubordi, deb xabar bermoqda Meduza.

Qayd etilishicha, Meduza ham yuborilgan ushbu xatga ega bo‘lib, uning haqiqiyligini vazirlik matbuot xizmati tasdiqlagan. Nashrning Sog‘liqni saqlash vazirligiga bo‘ysunadigan yirik federal markazlardan biri rahbariyatidagi manbasi shunday xat kelib tushganini tasdiqlagan.

Unda Rossiya Sog‘liqni saqlash vazirligi unga bo‘ysunadigan muassasalar rahbarlarini va vazirlikning asosiy shtatdan tashqari mutaxassislarining yangi koronavirus infeksiyasi mavzusiga oid har qanday sharhlari va jamoatchilikka e’lon qilinadigan ma’lumotlari elektron pochta yoki telefon orqali Sog‘liqni saqlash vazirligi matbuot xizmati tomonidan yozma yoki og‘zaki tarzda kelishilgan bo‘lishi kerakligi aytilgan.

Meduza’ga kelib tushgan rasmiy izohga ko‘ra, bu “aholini COVID-19 kasalligi tarqalishining oldini olish choralari to‘g‘risida xabardor qilish samaradorligini oshirish maqsadida” amalga oshirildi.

Ayni paytda koronavirus borasida tarqalgan xabarlar juda ko‘p va ular orasida unchalik katta ahamiyatga ega bo‘lmagani, turli soha mutaxassislarining taxminlari va prognozlari ham bor.

COVID-19 kasalligining tarqalishiga qarshi kurashish va oldini olish bo‘yicha chora-tadbirlar to‘g‘risida aholini xabardor qilish samaradorligini oshirish maqsadida shtatdan tashqari mutaxassislar hamda vazirlikka bo‘ysunuvchi muassasalar e’tiborini OAVlar bilan ishlashni muvofiqlashtirish zarurligiga qaratishga qaror qilingan.

Mamlakat Sog‘liqni saqlash vazirligi saytida unga bo‘ysunuvchi 167 ta federal muassasalardan iborat ro‘yxat e’lon qilingan. Rossiya regionlaridagi kasalxonalar mahalliy sog‘liqni saqlash organlariga bo‘ysunadi.

Xabar Meduza’da e’lon qilingach sog‘liqni saqlash vazirining yordamchisi Aleksey Kuznetsov yuqoridagi ko‘rsatmada COVID-19’ning oldini olish va davolash choralari borasidagi izohlarni vazirlik bilan muvofiqlashtirgan holda berish haqida gap ketayotganini ma’lum qilgan.

“Ta’kidlash joizki, muassasalar va mutaxassislarga yuborilgan tavsiyalar shifokorlarning kasbiy faoliyati bilan bog‘liq turli jihatlar, shu jumladan, muammoli masalalar bo‘yicha fikr bildirish imkoniyatiga hech qanday ta’sir qilmaydi”, — deb qo‘shimcha qilgan Kuznetsov.