Fransiyaning Nitssa shahrida terrorchi odamlarga pichoq bilan hujum qildi. Uch kishi vafot etdi

Fransiyaning Nitssa shahrida pichoq bilan qurollangan kishi Notr-Dam bazilikasi mehmonlariga hujum qildi, deya xabar bermoqda Meduza.

Ma’lum qilinishicha, uch kishi o‘ldirilgan (ba’zi mahalliy OAVlarning xabariga ko‘ra, bir ayolning boshi kesilgan), yana bir necha kishi jarohat olgan. Le Figaro nashrining yozishicha, bir ayol bazilikaning o‘zida, ikkinchisi — uning yonidagi kafeda o‘ldirilgan. U yerda ayol jinoyatchidan yashirinmoqchi bo‘lgan. Uchinchi qurbon erkak kishi bo‘lgan.

Gumonlanuvchi politsiya tomonidan ushlangan. U yaralangan va hozir kasalxonaga joylashtirilgan.

Hozircha jinoyatchining shaxsi va hujum sabablari haqida hech narsa xabar qilinmagan. Nitssa shahar hokimi Kristian Estrosining ta’kidlashicha, voqea terrorchilik hujumi belgilariga ega. Ichki ishlar vazirligi huzurida voqeani tekshirish uchun vazir Gerald Darmanen boshchiligidagi maxsus shtab tashkil etildi.

Eslatib o‘tamiz, Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Payg‘ambar Muhammad (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ba’zi mamlakatlarda Fransiyada ishlab chiqarilgan mahsulotlarni boykot qilish boshlandi.