Koronavirus pandemiyasi davrida Yaponiyada homiladorlik va nikoh ko‘rsatkichlarining pasayishi tez qariyotgan mamlakatdagi demografik inqirozni yanada kuchaytirishi mumkin, deb xabar beradi Cursorinfo.co.il.
Yaponiya jamiyati dunyodagi keksa jamiyat hisoblanadi. Bu mamlakatda 2050-yilga kelib aholining 35 foizi 65 yoshdan oshishi kutilmoqda. Bu esa iqtisodiy o‘sish uchun xavflar yaratadi va mamlakat moliyasini qiyin ahvolga solib qo‘yishi mumkin.
“Koronavirus tarqalishi odamlarning homiladorlik, farzand ko‘rish va bolalarni tarbiyalash borasida xavotirga tushishiga sabab bo‘lmoqda”, — dedi Yaponiyada tug‘ilish ko‘rsatkichining kamayishi masalalari bo‘yicha vazir Tetsushi Sakamoto.
Yaqinda e’lon qilingan rasmiy ma’lumotlarga ko‘ra, Yaponiyada uch oy ichida qayd etilgan homiladorlar soni o‘tgan yilning shu davriga qaraganda 11,4 foizga, nikohlar soni esa 36,9 foizga pasaygan.
“Bu juda jiddiy masala, chunki salbiy oqibatlar saqlanib qolishi mumkin, iqtisodiy pasayish esa kam nikohga va kam tug‘ilishga olib keladi”, — dedi Dai-ichi Life Research Institute bosh iqtisodchisi Xideo Kumano.
Pandemiya mamlakatda mavjud bo‘lib kelgan tug‘ilish ko‘rsatkichining pasayishi tendensiyasini kuchaytirdi, buni sobiq bosh vazir “milliy inqiroz” deb atagan edi. 2019-yil Yaponiyada tug‘ilish darajasi 5,8 foizga kamayib, 865 ming bola tug‘ilgan, bu tarixdagi eng past ko‘rsatkichdir.
Yaponiya Pediatriya assotsiatsiyasining ogohlantirishicha, pandemiya tufayli tug‘ilish ko‘rsatkichining pasayishi o‘n yilga tezlashishi mumkin, bu tendensiya pediatriya tibbiyotini yo‘q qilishi, shuningdek, boshqa uzoq davom etuvchi oqibatlarga olib kelishi mumkin.
Xalqaro valyuta jamg‘armasi 2021-yilda dunyo iqtisodiyoti 5,2 foizga o‘sishini taxmin qilmoqda, Yaponiyada esa bu ko‘rsatkich 2,3 foiz bo‘lishi kutilmoqda.
Yaponiyaning Nikkei gazetasi o‘tkazgan so‘rovda ma’lum bo‘lishicha, unda qatnashgan 22 nafar iqtisodchining ko‘pchiligi Yaponiya iqtisodiyoti 2024-yilgacha pandemiyadan oldingi darajaga qaytmaydi, degan fikrda.
Izoh (0)