Saudiya Arabistonining Jidda shahrida joylashgan Fransiya konsulligi qo‘riqchisiga hujum uyushtirildi, jabrlanuvchi shifoxonaga yotqizilgan. Bu haqda mamlakatning Saudiyadagi diplomatik vakolatxonasi xabar bergan.
Qo‘riqchiga mahalliy aholi vakili tomonidan pichoq bilan jarohat yetkazilgan. Unga og‘ir jarohat olmagan, deyiladi elchixonaning bayonotida. Qo‘riqchining qay tarzda va nima uchun hujumga uchragani ma’lum emas.
Avval Fransiyaning Nitssa shahrida pichoq ko‘targan erkak Notr-Dam bazilikasi mehmonlariga hujum qilgan va uch kishini pichoqlab o‘ldirgani, Avinyon kommunasida pichoq ko‘targan erkak politsiyachilarga hujum uyushtirgani, oqibatda huquq-tartibot idoralarining xodimlari uni otib tashlagani haqida xabarlar berilgandi.
Eslatib o‘tamiz, Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Payg‘ambar Muhammad (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ayrim mamlakatlarda Fransiyada ishlab chiqarilgan mahsulotlarga nisbatan boykot e’lon qilina boshlandi.
Mavzuga doir: O‘zbekiston musulmonlari idorasi Muhammad (s.a.v) haqidagi karikatura atrofida yuzaga kelgan bahslarga munosabat bildirdi
Izoh (0)