Россия Соғлиқни сақлаш вазирлиги унга бўйсунувчи шифокорлар ва тиббиёт муассасаларига янги коронавирус инфекцияси бўйича жамоатчиликка бериладиган ҳар қандай баёнотни мувофиқлаштириш тўғрисида кўрсатма юборди, деб хабар бермоқда Meduza.
Қайд этилишича, Meduza ҳам юборилган ушбу хатга эга бўлиб, унинг ҳақиқийлигини вазирлик матбуот хизмати тасдиқлаган. Нашрнинг Соғлиқни сақлаш вазирлигига бўйсунадиган йирик федерал марказлардан бири раҳбариятидаги манбаси шундай хат келиб тушганини тасдиқлаган.
Унда Россия Соғлиқни сақлаш вазирлиги унга бўйсунадиган муассасалар раҳбарларини ва вазирликнинг асосий штатдан ташқари мутахассисларининг янги коронавирус инфекцияси мавзусига оид ҳар қандай шарҳлари ва жамоатчиликка эълон қилинадиган маълумотлари электрон почта ёки телефон орқали Соғлиқни сақлаш вазирлиги матбуот хизмати томонидан ёзма ёки оғзаки тарзда келишилган бўлиши кераклиги айтилган.
Meduza’га келиб тушган расмий изоҳга кўра, бу «аҳолини COVID-19 касаллиги тарқалишининг олдини олиш чоралари тўғрисида хабардор қилиш самарадорлигини ошириш мақсадида» амалга оширилди.
Айни пайтда коронавирус борасида тарқалган хабарлар жуда кўп ва улар орасида унчалик катта аҳамиятга эга бўлмагани, турли соҳа мутахассисларининг тахминлари ва прогнозлари ҳам бор.
COVID-19 касаллигининг тарқалишига қарши курашиш ва олдини олиш бўйича чора-тадбирлар тўғрисида аҳолини хабардор қилиш самарадорлигини ошириш мақсадида штатдан ташқари мутахассислар ҳамда вазирликка бўйсунувчи муассасалар эътиборини ОАВлар билан ишлашни мувофиқлаштириш зарурлигига қаратишга қарор қилинган.
Мамлакат Соғлиқни сақлаш вазирлиги сайтида унга бўйсунувчи 167 та федерал муассасалардан иборат рўйхат эълон қилинган. Россия регионларидаги касалхоналар маҳаллий соғлиқни сақлаш органларига бўйсунади.
Хабар Meduza’да эълон қилингач соғлиқни сақлаш вазирининг ёрдамчиси Алексей Кузнецов юқоридаги кўрсатмада COVID-19’нинг олдини олиш ва даволаш чоралари борасидаги изоҳларни вазирлик билан мувофиқлаштирган ҳолда бериш ҳақида гап кетаётганини маълум қилган.
«Таъкидлаш жоизки, муассасалар ва мутахассисларга юборилган тавсиялар шифокорларнинг касбий фаолияти билан боғлиқ турли жиҳатлар, шу жумладан, муаммоли масалалар бўйича фикр билдириш имкониятига ҳеч қандай таъсир қилмайди», — деб қўшимча қилган Кузнецов.
Изоҳ (0)