Rossiyada 28-oktabr kuni ertalab 16 202 kishida koronavirus aniqlandi, deb xabar bermoqda Meduza.
Yangi aniqlangan kasallanish holatlarining eng ko‘pi Moskva ( +3670 kishi), Sankt-Peterburg (+727) va Moskva viloyatida (+505) qayd etilgan.
Rossiyada kasallanganlarning umumiy soni 1 563 976 nafarga yetdi.
Sutka davomida COVID-19 bemorlarining 346 nafari vafot etgan — sutka davomidagi o‘limlar soni bo‘yicha yangi antirekord. Avvalgi antirekord bundan bir kun avval, 27-oktabrda qayd etilgan, sutka davomida 320 kishi COVID-19’dan vafot etgandi.
Mamlakatda epidemiya boshlanganidan beri COVID-19’dan 26 935 kishi vafot etgan.
Sog‘ayganlar soni esa 1 171 301 nafarni tashkil etmoqda, shu jumladan, bemorlarning 12 361 nafari so‘nggi bir kecha-kunduzda tuzalib, kasalxonadan javob berilgan.
“Rospotrebnadzor” ma’lumotlariga ko‘ra, Rossiyada koronavirusni aniqlash bo‘yicha so‘nggi 24 soat davomida 506 mingta, umumiy hisobda esa 58,7 milliondan ortiq test o‘tkazilgan.
Rossiyada jami kasallanganlar soni 1,5 milliondan oshganiga qaramay, hukumat mamlakatda koronavirus tarqalishi tufayli qat’iy cheklovlarni joriy qilishni rejalashtirmayapti. “Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.
“Rospotrebnadzor” Epidemiologiya markaziy ilmiy-tadqiqot instituti direktorining tadqiqot ishlari bo‘yicha o‘rinbosari Aleksandr Gorelov Rossiyada mart oyigacha koronavirus bilan kasallanishlar soni kamayishini taxmin qilgan. Gamaleya nomidagi Milliy epidemiologiya va mikrobiologiya ilmiy-tadqiqot markazi yashirin infeksiyalar mikrobiologiyasi bo‘limining sobiq rahbari, professor, virusolog Viktor Zuyev esa mamlakatda epidemiologik vaziyat 2021-yil yozida barqarorlashadi, degan fikrda.
Izoh (0)