Rossiyada koronavirusga chalinish holatlari soni keyingi yilning fevral—mart oylariga qadar 2020-yil iyun—iyul oylaridagi korsatkichgacha kamayadi. “RBK”ning xabar berishicha, “Rospotrebnadzor” Epidemiologiya Markaziy ilmiy-tadqiqot instituti direktorining tadqiqot ishlari bo‘yicha o‘rinbosari Aleksandr Gorelov “Rossiya 24” telekanali efirida shunday prognoz qilgan.
Foto: “RBK”
Uning aytishicha, COVID-19 bilan kasallanganlar soni kamida yana “ikki inkubatsiya davri, ya’ni 28 kun” davomida o‘sib boradi, shundan so‘ng mamlakatda epidemiologik vaziyat barqarorlasha boshlaydi.
“Oxirgi barqarorlashuv va pasayish bosqichi, mening fikrimcha, fevral—mart oylaridan erta boshlanmaydi”, — degan Gorelov. “Biz iyun—iyul oylarida kuzatgan vaziyat fevral—mart oylarida ham kuzatiladi”, — deya qo'shimcha qilgan u.
Ayni paytda Rossiyada koronavirusga chalinish holatlari soni ortib bormoqda. 11-oktabr kuni mamlakatda ilk bor bir sutka davomida 13 mingdan ziyod COVID-19 bilan kasallanish holati qayd etildi. Shunday sharoitda Rossiya kasalxonalarida koronavirus bilan og‘rigan bemorlar uchun joylar tugamoqda, tez yordamni soatlab, ba’zan kunlab kutishmoqda.
Mamlakat poytaxtida kasallanish holat eng ko‘p bo‘lgani tufayli Moskvada tibbiyot oliygohlari talabalari COVID-19’ga qarshi kurashish uchun kasalxonalarga chaqirilmoqda. Bir oy ichida Moskvada kasallanish holatlari besh martadan ko‘proq o‘sdi. Kasalxonalarga eng og‘ir bemorlar yotqizilmoqda.
“Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.
