BMTning Butunjahon turizm tashkiloti xalqaro turizmning 2020-yil yakunlariga ko‘ra 70 foizgacha qisqarishi va optimistik ssenariy bo‘yicha 2021-yil III choragidan erta tiklanmasligini prognoz qildi.
“Dunyoda xalqaro turizm 2021-yilning uchinchi choragida qayta tiklanishi mumkin. Biroq ekspertlarning 20 foizi ushbu hodisa 2022-yilda sodir bo‘lishini taxmin qilmoqda”, – deyiladi xabarda.
Tashkilot vakillarining fikricha, sohaning qayta tiklanishiga xalaqit qiladigan bir nechta omillar mavjud. Koronavirusni jilovlashning juda sekin kechayotgani, mamlakatlarning pandemiyaga qarshi muvofiqlashtirilgan cheklovlar qo‘llamayotgani, yomonlashgan iqtisodiy vaziyat, shular jumlasidan.
“2020-yilning sakkiz oyi davomida xalqaro sayohatlar soni o‘tgan yilning mos davriga nisbatan 700 million yoki 70 foizga qisqargan, oqibatda sohada 730 milliard AQSh dollari miqdorida mablag‘ yo‘qotilgan. Bu 2009-yildagi jahon moliyaviy-iqtisodiy inqirozi paytida yetgan zarardan sakkiz baravarga ko‘p”, – deyiladi UNWTO hisobotida.
Iyul oyida xalqaro sayohatlar soni 81 foizga, avgustda esa 79 foizga tushib ketgan. Odatda ushbu ikki oy yil davomidagi yuklama hajmi eng ko‘p mavsum hisoblanadi.
Turistik oqimning kamayishi butun dunyoda kuzatilgan. Osiyo-Tinch okeani mintaqasi COVID-19 pandemiyasidan eng ko‘p zarar ko‘rgan, tashriflar soni 79 foizga tushib qolgan. Keyingi o‘rinlarda Afrika va Yaqin Sharq (ikkovida ham -69 foiz), Yevropa (-68 foiz) hamda Amerika (-65 foiz) joylashgan.
“Yevropada chegaralarning ehtiyotkorlik bilan ochilishi natijasida sohadagi pastlash nisbatan susaygan (iyulda -72 foiz va avgustda -69foiz). Ammo tiklanish uzoq davom etmadi, kasallanishlar sonining oshishi oqibatida yana cheklovlar joriy qilingan”, – deya qayd etgan UNWTO.
Mavzuga doir: Yevropa Ittifoqida turizm sektori pandemiya sabab daromadlarining chorak qisminigina saqlab qolgani ma’lum bo‘ldi
“Sayohatlarga bo‘lgan talab pandemiya tufayli yuzaga kelgan noaniqliklar sabab kamaygan. 2020-yil davomidagi pasayish 70 foizni tashkil qilishi taxmin qilinmoqda”, deyiladi tashkilot bayonotida.
2020-yil iyun oyida Jahon turizm tashkiloti karantindan keyin turizm butun dunyoda qayta tiklana boshlaganini ma’lum qilgandi.
Izoh (0)