Rossiyaning Rostov viloyati sog‘liqni saqlash vaziri Tatyana Bikovskaya pensiyaga chiqishi munosabati bilan lavozimidan ozod etildi. Bu haqda hudud hukumati xabar berdi, deb yozadi Meduza.
Bundan tashqari, Rostov-Don ma’muriyati rahbari shahar sog‘liqni saqlash boshqarmasi boshlig‘i Nadejda Levitskayani ishdan bo‘shatdi.
Bikovskaya va Levitskayaning iste’folari Rostov-Dondagi 20-sonli shahar kasalxonasi qoshidagi koronavirus gospitalida 13 kishi vafot etgani haqida xabarlar tarqalganidan keyin bir hafta o‘tib yuz berdi.
21-oktabr kuni 20-sonli shifoxonaning COVID-19’ga chalingan bemorlari “tibbiy kislorod bilan ta’minlashda uzoq tanaffus bo‘lgani sababli nafasi qisilib vafot etgani” xabar berilgan edi. Levitskaya kasalxonada kislorod yetkazish bilan bog‘liq muammo bo‘lmaganini aytgandi.
Shuningdek, Rostov-Don ma’muriyati “vafot etgan bemorlar soni va ularning o‘limi sabablari haqidagi ma’lumot” haqiqatga to‘g‘ri kelmasligini qayd etgan edi.
Eslatib o‘tamiz, Rossiya fuqarolariga odamlar ommaviy to‘planadigan joylarda, transportda, avtomobil turargohlarida va liftlarda himoya niqoblarini taqish majburiy bo‘ldi. Shuningdek, Rossiyaning “Vektor” virusologiya va biotexnologiya davlat ilmiy markazi mamlakatdagi koronavirusga qarshi ikkinchi vaksinani ishlab chiqarishni boshladi.
Izoh (0)