JSST: Dunyoda koronavirusga chalinish holatlari o‘sishi bo‘yicha antirekord qayd etildi

O‘tgan bir hafta ichida dunyoda koronavirusga chalinish holatlari soni bo‘yicha rekord daraja qayd etildi, deb yozadi “RBK” Jahon sog‘liqni saqlash tashkilotiga tayanib.

19-oktabrdan 25-oktabrgacha 2,8 million kishida COVID-19 aniqlandi. Bu pandemiya boshidan buyon eng katta ko‘rsatkichdir. Koronavirusdan qariyb 40 ming kishi bir hafta ichida vafot etgan.

JSST ma’lumotlariga ko‘ra, kasallanish, ayniqsa, Yevropa mintaqasida tez o‘smoqda, u yerda bir haftada COVID-19 bilan bog‘liq yangi holatlarning deyarli yarmi qayd etilgan — 1,3 milliondan ortiq kishi kasallikni yuqtirib olgan, bu o‘tgan haftadagidan 33 foizga ko‘p demakdir.

Bir haftalik o‘sish bo‘yicha yuqori beshlikka quyidagi mamlakatlar kirdi:

• Fransiya — 217,7 ming bemor;
• Buyuk Britaniya — 148,5 ming;
• Rossiya — 114,5 ming;
• Italiya — 101,9 ming;
• Belgiya — 90,8 ming.

Shimoliy va Janubiy Amerikada bir haftada 884 ming kishi koronavirusni yuqtirgan. Ularning deyarli yarmida AQShda qayd etilgan. Janubi-sharqiy Osiyoda esa virusga chalinganlar soni bir haftada 445,8 ming nafarga oshgan. Yangi holatlarning eng katta qismi Hindistonda aniqlangan.

Ma’lumot uchun, dunyoda koronavirusga chalinganlar soni 5-oktabr kuni 35 milliondan, 11-oktabr kuni 37 million, 14-oktabr kuni 38 million, 19-oktabr kuni 40 million, 22-oktabr kuni  41 million, 24-oktabr kuni 42 million, 26-oktabrda esa 43 million kishidan oshgan.