Rossiya hukumati mamlakatda koronavirus tarqalishi tufayli qat’iy cheklovlarni joriy qilishni rejalashtirmayapti. Bu haqda Rossiya sanoatchilar va tadbirkorlar ittifoqi a’zolari bilan uchrashuvda prezident Vladimir Putin ma’lum qildi, deb yozadi Meduza.
Foto: “RIA Novosti”
“Qat’iy, ommaviy cheklov choralari kiritilishi mumkinligi haqida gapirsam, biz bunday qilishni rejalashtirmayapmiz. Hukumatning bunday rejalari yo‘q”, — dedi Putin.
Biznesmenlar ham uchrashuvda Putindan umummilliy lokdaunni joriy qilmaslikni so‘radi. Putinning ta’kidlashicha, yaqin orada ma’lum nuqtalarga qaratilgan cheklovlar amal qilishda davom etadi, chunki ular o‘z samaradorligini ko‘rsatdi.
Rossiyada umummilliy lokdaun rejimi mart oxiridan may o‘rtalarigacha amal qilgan edi: korxonalarning ko‘pchiligi yopilgan, ularning ishchilari esa majburiy ravishda uylariga yuborilgandi. Uydan faqat eng zarur mahsulotlar uchun do‘konga yoki dorixonaga chiqish tavsiya etilgandi.
Yevropada oktabr oyida ikkita mamlakat — Chexiya va Irlandiya umummilliy lokdaun e’lon qildi.
Eslatib o‘tamiz, Rossiyada so‘nggi sutkada COVID-19 bemorlarining 317 nafari vafot etdi, bu Rossiyada pandemiya boshlanganidan buyon bir kecha-kunduzdagi o‘limlar soni bo‘yicha yangi antirekord.
