Wikipedia internet ensiklopediyasi 2020-yilgi AQSh prezidenti saylovlari haqidagi asosiy maqolani tahrirlash qoidalarini qat’iylashtirdi, deb yozadi Meduza.
21-oktabrdan amal qiluvchi yangi qoidalarga ko‘ra, saylovlar haqidagi bosh maqolani 30 kundan oldinroq ro‘yxatdan o‘tgan va turli maqolalarga kamida 500 marta tuzatish kiritgan foydalanuvchilargina tahrirlashi mumkin.
“Maqolani noinsof yoki prezident saylovida kim g‘olib chiqqani haqidagi muhim faktni ma’lum qiladigan odam o‘zi bo‘lishiga intiladigan o‘ta g‘ayratli muharrirlardan himoya qilishga qaror qildik”, — deydi Wikipedia muharriri Molli Uayt.
Uning so‘zlariga ko‘ra, saylov kuni Wikipedia bosh maqolani tahrirlash qoidalari yanada kuchaytirilib, saylov natijalari haqidagi dastlabki ma’lumotlarni faqat eng tajribali va ishonchli muharrirlargina yozishi mumkin bo‘ladi.
Wikipedia tuzatishlar kiritish ustidan nazorat qilish uchun boshqa vositalardan ham foydalanadi. Masalan, saylovlar bilan bog‘liq maqolalarning tahrirlanishi haqida muharrirlarning keng doirasiga bildirishnoma yuboriladi.
Wired qayd etishicha, Wikipedia’da shunga o‘xshash chora-tadbirlar koronavirus pandemiyasi haqidagi dezinformatsiyaga qarshi kurashish uchun ham qo‘llanilgan edi.
Eslatib o‘tamiz, AQShda prezidentlik saylovlari 2020-yilning 3-noyabr kuni bo‘lib o‘tadi.
Avvalroq AQShda 50 milliondan ko‘proq saylovchi prezidentlik saylovlarida muddatidan avval ovoz bergani xabar qilingan edi.
Izoh (0)