Qirg‘izistonning sobiq bosh vaziri Sapar Isakovga nisbatan davlatlararo qidiruv e’lon qilindi. Bu haqda Qirg‘iziston Jazoni ijro etish davlat xizmatiga tayanib, “24.kg” xabar berdi.
Shuningdek, qidiruv Bishkekning sobiq meri Albek Ibraimovga nisbatan ham e’lon qilingan. Unga nisbatan avvalroq jazodan qochish holati bo‘yicha jinoyat ishi qo‘zg‘atilgan.
Eslatib o‘tamiz, 5-oktabr kuni Bishkekda hukumatni qo‘llab-quvvatlovchi ikki partiya g‘olib chiqqach parlament saylovlari natijalariga qarshi namoyishlar boshlandi. Tinch boshlangan aksiyalar kechga borib huquq-tartibot organlari bilan to‘qnashuvlarga aylanib ketdi. Bir necha yuz kishi yaralandi, bir kishi vafot etdi.
6-oktabr tongida namoyishchilar Qirg‘iziston parlamenti va prezident ma’muriyati joylashgan binoni egalladi. Shundan so‘ng namoyishchilar Milliy xavfsizlik davlat qo‘mitasi binosiga qarab yo‘l oldi va maxsus xizmat xodimlari bilan muzokaralardan so‘ng ular sobiq prezident Almazbek Atambayevni o‘tgan yildan buyon hibsda saqlanayotgan MXDQ tergov izolyatoridan ozod qildi. Koloniyadan, shuningdek, Atambayev davrida hukumatni boshqargan sobiq bosh vazir Sapar Isakov ham ozod etildi. U korrupsiyada ayblanib, 2020-yilning iyun oyida 18 yilga ozodlikdan mahrum etilgandi,
Shuningdek, tartibsizliklar vaqtida Bishkek meriyasi binosiga bostirib kirgan namoyishchilar “Respublika” partiyasidan Qirg‘iziston parlamenti deputatligiga nomzod Jo‘shbek Koyenaliyevni shahar meri deb e’lon qilgandi.
Tartibsizliklargacha shahar meri lavozimida ishlab kelgan Aziz Surakmatov 20-oktabr kuni iste’foga chiqqan. U shaharga rahbarlik qilish uchun o‘zining birinchi o‘rinbosari Narimon Tulyeyevni ko‘ndirgan, biroq Tulyeyev Qirg‘iziston poytaxti rahbari majburiyatlarini bajarishdan bosh tortgan va mer vazifasini vaqtincha bajaruvchi etib merning birinchi o‘rinbosari Almaz Baketayev tayinlanishini bildirgan.
Izoh (0)