Wikipedia интернет энциклопедияси 2020 йилги АҚШ президенти сайловлари ҳақидаги асосий мақолани таҳрирлаш қоидаларини қатъийлаштирди, деб ёзади Meduza.
21 октябрдан амал қилувчи янги қоидаларга кўра, сайловлар ҳақидаги бош мақолани 30 кундан олдинроқ рўйхатдан ўтган ва турли мақолаларга камида 500 марта тузатиш киритган фойдаланувчиларгина таҳрирлаши мумкин.
«Мақолани ноинсоф ёки президент сайловида ким ғолиб чиққани ҳақидаги муҳим фактни маълум қиладиган одам ўзи бўлишига интиладиган ўта ғайратли муҳаррирлардан ҳимоя қилишга қарор қилдик», — дейди Wikipedia муҳаррири Молли Уайт.
Унинг сўзларига кўра, сайлов куни Wikipedia бош мақолани таҳрирлаш қоидалари янада кучайтирилиб, сайлов натижалари ҳақидаги дастлабки маълумотларни фақат энг тажрибали ва ишончли муҳаррирларгина ёзиши мумкин бўлади.
Wikipedia тузатишлар киритиш устидан назорат қилиш учун бошқа воситалардан ҳам фойдаланади. Масалан, сайловлар билан боғлиқ мақолаларнинг таҳрирланиши ҳақида муҳаррирларнинг кенг доирасига билдиришнома юборилади.
Wired қайд этишича, Wikipedia’да шунга ўхшаш чора-тадбирлар коронавирус пандемияси ҳақидаги дезинформацияга қарши курашиш учун ҳам қўлланилган эди.
Эслатиб ўтамиз, АҚШда президентлик сайловлари 2020 йилнинг 3 ноябрь куни бўлиб ўтади.
Аввалроқ АҚШда 50 миллиондан кўпроқ сайловчи президентлик сайловларида муддатидан аввал овоз бергани хабар қилинган эди.
Изоҳ (0)