Toshkentda 74 000 dollar evaziga E-ijro auksion savdolaridan har xil rusumdagi avtomashinalarni xarid qilib berishni va’da qilib, fuqaroni aldab ketgan shaxs qo‘lga olindi, deya xabar bermoqda Bosh prokuratura matbuot xizmatiga tayanib “Xabar.uz”.
Qayd etilishicha, T.Y. yuqori lavozimda ishlovchi tanishlari orqali E-ijro auksion savdolaridan har xil rusumdagi avtomashinalarni xarid qilib berish evaziga fuqaro S.E.ni 74 000 AQSh dollariga chuv tushirgan.
Holat yuzasidan Bosh prokuratura huzuridagi departamentning Yakkasaroy tuman bo‘limi fuqaro T.Y.ga nisbatan firibgarlik alomatlari bo‘yicha jinoyat ishi qo‘zg‘atdi.
Qo‘zg‘atilgan jinoyat ishi bo‘yicha tergov harakatlari olib borilmoqda.
Avvalroq Namanganda xorij universitetiga o‘qishga kiritish va keyinroq NamDUga “perevod” qilib berish evaziga 2000 dollar so‘ragan doktorant, Toshkentdan uy olib berishni va’da qilib, fuqaroni 20 ming dollarga chuv tushirgan shaxs, Namanganda tanishining shaxsiy videosini tarqatmaslik evaziga 100 dollar talab qilgan shaxs va Samarqandda talabaning salkam 127 mln so‘m kontrakt pulini to‘lab berishni va’da qilib, uning 2200 dollarini o‘zlashtirgan fuqaro qo‘lga olingani haqida xabar berilgandi.
Izoh (0)