Toshkent shahrida yashovchi fuqarodan unga nisbatan jarima yozmaslik evaziga 300 AQSh dollari talab qilgan gaz ta’minoti idorasi xodimlari ushlandi, deya xabar bermoqda shahar IIBB.
Ma’lum qilinishicha, 21-oktabr kuni Toshkent shahar IIBBga kelib tushgan xabarga ko‘ra, 13-oktabr kuni uch nafar erkak o‘zlarini Sergeli tuman gaz ishchilari sifatida tanishtirib, xonadonlardan birida noqonuniy o‘rnatilgan isituvchi bug‘ qozon va pol isitish tizimini aniqlab, jarima 8 million so‘mni tashkil etishini aytishgan.
Akt tuzmasdan masalani hal qilib berishni bahona qilib, mazkur shaxslar xonadon egasidan 300 AQSh dollari miqdorida noqonuniy pul talab qilib, oldindan to‘lov tariqasida 520 000 so‘m olib ketishgan. Shundan so‘ng tuman gaz ishchilari muntazam ravishda fuqarodan qolgan 250 AQSh dollarini talab qilib yurishgan.
21-oktabr kuni taxminan soat 13:00 da tezkor tadbir davomida Toshkent shahar IIBB JQB iqtisodiy xavfsizlik va korrupsiyaga qarshi kurash bo‘limi xodimlari O‘zbekiston Bosh prokuraturasi huzuridagi Iqtisodiy jinoyatlarga qarshi kurashish departamenti hamkorligida “Hududgaz Poytaxt” gaz ta’minotining Sergeli filiali xodimi 30 yoshli Nursulton B.ni 250 AQSh dollari olish vaqtida qo‘lga oldi.
Shuningdek, o‘z ish hududlariga qarashli bo‘lmagan manzillarni tekshirib, xizmat vakolatlarini suiiste’mol qilgan “Hududgaz Poytaxt” gaz ta’minotining Sergeli filiali xodimlari – 30 yoshli Davronbek M. va fuqaro 27 yoshli Hamidullo A. ashyoviy dalillar asosida surishtiruvga jalb qilindi.
To‘plangan hujjatlar O‘zbekiston Bosh prokuraturasi huzuridagi Iqtisodiy jinoyatlarga qarshi kurashish departamentining tuman bo‘limiga yo‘naltirildi. Tergov harakatlari olib borilmoqda.
Avvalroq Toshkent viloyatida YPX komandiriga 350 dollar pora taklif qilgan shaxs, Samarqandda tibbiyot oliygohiga kiritib qo‘yishni va’da qilib, abituriyentdan 7 ming dollar olgan stomatolog, Toshkentda bo‘shab qolgan deputatlik o‘rniga saylanishda yordam berish uchun 3000 dollar so‘ragan deputat va Jizzaxda fuqaroni 2 mln evaziga koronavirusga chalinganlarni davolash markaziga ishga kiritishni va’da qilgan SSB mutaxassisi qo‘lga olingani haqida xabar berilgandi.
Izoh (0)