Namanganda xorij universitetiga o‘qishga kiritish va keyinroq NamDUga “perevod” qilib berish evaziga 2000 dollar so‘ragan doktorant qo‘lga tushdi
Namangan davlat universiteti doktoranti, 1987-yil Chust tumanida tug‘ilgan shaxs abituriyentlarni Qirg‘iziston yoki Ukraina OTMlariga o‘qishga kiritish va keyinchalik ularning o‘qishini NamDUga ko‘chirishni va’da qilib, pul talab qilgani aniqlandi. Bu haqda “Daryo”ning huquq-tartibot organlaridagi manbalari xabar qildi.
Dastlab doktorantning fuqaroni 2000 AQSh dollari evaziga Qirg‘iziston OTMlarining biriga o‘qishga kiritib qo‘yishini hamda 2021/2022-o‘quv yilida Namangan davlat universitetiga o‘qishini ko‘chirtirib berishini aytib, turmush o‘rtog‘i vositachiligida so‘ralgan pulni olgan vaqtida DXX Namangan viloyati boshqarmasi hamda Bosh prokuratura huzuridagi departamentning hududiy boshqarmasi xodimlari tomonidan qo‘lga olingan.
Unga nisbatan jinoyat ishi qo‘zg‘atilib, tergov harakatlari davom etayotgan bir vaqtda fuqaro o‘zining jinoiy qilmishlarini davom ettirgan. Ya’ni boshqa bir fuqaroga Ukraina davlatining Xarkov Milliy universitetidan o‘qishini NamDUga ko‘chirtirib berishini va’da qilib, buning uchun 800 AQSh dollari va 2 million so‘m olgan vaqtida qo‘lga tushgan.
Surishtiruv jarayonida uning fuqarodan oldin ham 2000 AQSh dollari miqdorida pul olgani ma’lum bo‘lgan. Holatlar yuzasidan jinoyat ishlari qo‘zg‘atilib, tergov harakatlari olib borilmoqda.
2020-yil iyun oyida Namanganda litsey o‘qituvchisi universitetga o‘qishga kiritib qo‘yishni va’da qilib, 2,5 ming AQSh dollari va 5 million so‘m miqdorida pul talab qilgan va ularni olayotgan vaqtida qo‘lga tushgani xabar qilingandi. Shuningdek, avval Termizda 10 million so‘mga soxta diplom rasmiylashtirib bermoqchi bo‘lgan kollej direktori o‘rinbosari DXX tomonidan qo‘lga tushgani, Sirdaryoda fuqaroni qalbaki ma’lumotlar yordamida o‘qishga kiritib qo‘ymoqchi bo‘lgan shaxslar ushlangani va 5 ming dollar evaziga konservatoriyaga o‘qishga kiritib qo‘yishni va’da qilgan litsey o‘qituvchisi qo‘lga olingani, Toshkentda ishga kiritib qo‘yish uchun fuqarolardan qariyb 19 million so‘m undirayotgan “mayor” hibsga olingani haqida xabarlar berilgan.
