Namanganda viloyat oziq-ovqat zaxira jamg‘armasi tashkil etilib, mahalliy budjetning qo‘shimcha mablag‘lari hisobidan 10 milliard so‘m o‘tkazib beriladi. Bu haqda viloyat hokimi Shavkatjon Abdurazzoqov xalq deputatlari viloyat kengashining sessiyasida ma’lum qildi, deya xabar beradi “Daryo” muxbiri Azizbek Abduvaliyev.
Abdurazzoqovga ko‘ra, keyinchalik bu ko‘rsatkich 25 milliard so‘mga yetkaziladi.
Jamg‘armaning asosiy vazifasi oziq-ovqat mahsulotlari, birinchi galda go‘sht, shakar, o‘simlik yog‘i va gurunchni mahalliy hamda import qiluvchi korxonalar orqali xarid qilish, jamg‘arish va iste’molga yo‘naltirishdan iborat bo‘ladi.
Mazkur jamg‘arma mablag‘lari hisobidan birinchi bosqichda 500 tonna guruch, shuncha tonna shakar va o‘simlik yog‘i zaxirasi shakllantiriladi. 500 bosh qoramol xarid qilinadi, Qirg‘izistondan 1000 tonna kartoshka olib kelinadi.
Viloyatdagi 14 ta markaziy dehqon bozorida arzonlashtirilgan narxlarda savdo-sotiq qiladigan “Elga xizmat” rastalari tashkil etiladi. Har bir mahallada oziq-ovqat do‘konlari va kichik ekobozorlar faoliyati yo‘lga qo‘yiladi.
“Viloyatimizda aholi ixtiyorida 35 ming gektardan ko‘proq tomorqa yerlari mavjud. Bu viloyatda paxta ekini uchun ajratilgan maydonlarning teng yarmi degani. Ulardan 2020-yilda 1,1 million tonna, ya’ni o‘tgan yilga nisbatan 170 foizga ko‘p hosil kutilmoqda. Bozorlarimizda go‘sht, sut pavilyonlari deyarli yo‘qolib ketdi, ularni tiklashga alohida e’tibor qaratamiz. Ulgurji, qoplab sotadigan bozorlarimiz yo‘q, vaholanki, ularning mavjudligi narx-navo barqarorligiga jiddiy ta’sir ko‘rsatadi. Har bir mahallada kichik ekobozorlar tashkil etiladi, bu bilan markaziy bozorlarga vaqt va mablag‘ sarflab qatnashga hojat qolmaydi, — dedi Shavkatjon Abdurazzoqov.
Viloyat hokimi sessiya davomida jurnalist va blogerlarning aholini asosiy turdagi oziq-ovqat mahsulotlari bilan kafolatli ta’minlash borasidagi ko‘plab savollariga javob berdi.
Izoh (0)