“Daryo” muxbirining xabar berishicha, samarqandlik fuqaro B.A. 2019-yilning oktabr oyida Samarqand shahrining Dahbed ko‘chasida yashovchi fuqaro Xurshida Gadoyevaning ishonchiga kirib, uning Samarqand davlat universitetiga to‘lashi lozim bo‘lgan 126 million 976 ming so‘m to‘lov-kontraktini o‘zi axloq tuzatish ishlari jazosini o‘tayotgan “Shahzoda Ulug‘bek servis” MChJning hisob raqamidan to‘lab berishini aytib, Xurshida Gadoyevadan bo‘lib-bo‘lib 2200 dollar pul olgan.
B.A. fuqarodan Samarqand davlat universitetining to‘lov-shartnoma blankasini olib, ushbu blankaga va to‘lov topshiriqnomasiga go‘yoki uning o‘qishi uchun to‘lov-shartnomasi bo‘yicha universitet hisob raqamiga 126 million 976 ming so‘m pul mablag‘lari ko‘chirilganligi to‘g‘risida “Shahzoda Ulug‘bek servis” MChJning muhri va MChJ direktori M.Doniyorovning imzosini soxtalashtirib, soxta shartnoma va to‘lov topshiriqnomasini taqdim etgan.
Jinoyat ishlari bo‘yicha Samarqand shahar sudi sudyasi Farruh Samatovning ma’lum qilishicha, B.A. xavfli retsidivist bo‘lib, bundan avval ham bir necha bor firibgarlik, o‘zganing mulkini aldash yoki ishonchini suiiste’mol qilish jinoyatlarini sodir etgan.
Mazkur jinoyat ishi yuzasidan respublika sud ekspertiza markazi Samarqand viloyati bo‘limining 2020-yil 18-martdagi xulosasiga ko‘ra, B.A. taqdim etgan to‘lov kontrakt shartnomasi soxtalashtirilganligi ma’lum bo‘lgan.
Jinoyat ishlari bo‘yicha Samarqand shahar sudida sudlanuvchi B.A.ning jinoyat ishi ko‘rib chiqilib, u Jinoyat kodeksining 168-moddasi 3-qismi “b” bandi (takroran yoki xavfli retsidivist tomonidan firibgarlik) va 228-moddasi 1-qismi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan aybli deb topilib, 5 yil muddatga ozodlikdan mahrum qilingan.
Shuningdek, unga bazaviy hisoblash miqdorining 20 foizini davlat daromadi hisobiga ushlab qolgan holda 3 yil muddatga axloq tuzatish ishlari jazosi ham qo‘llanilgan.
