Jo‘qorg‘i Kenesh (Qirg‘iziston parlamenti)ga qayta saylovlar 2020-yil 20-dekabrda bo‘lib o‘tishi belgilangan edi. “Interfaks”ning xabar berishicha, deputatlar mamlakat parlamentiga takroriy saylovlar o‘tkazish sanasini keyinga qoldirdi.
Xabarda aytilishicha, deputatlar yangi qonun loyihasini qabul qilgan bo‘lib, unga ko‘ra mamlakatda dastlab konstitutsiyaviy islohotlar amalga oshirilishi kerak. Qonun loyihasida saylovlarning keyinga qoldirilishi mamlakatda yuzaga kelgan og‘ir vaziyat, budjetning daromad qismi pasayishi va epidemiologik vaziyat bilan izohlangan.
Parlament saylovlarini o‘tkazishning yangi sanasi 2021-yil 1-iyundan kechiktirmay belgilanadi. Bu qarorni parlamentning 120 nafar deputatidan 83 nafari qo‘llab quvvatlagan.
Eslatib o‘tamiz, Qirg‘izistonda parlament saylovlaridan so‘ng yuzaga kelgan tartibsizliklar sharoitida mamlakat bosh vaziri Qubatbek Bo‘ronov, prezident So‘ronbay Jeenbekov o‘z lavozimlarini tark etdi. Mamlakat prezidenti vazifasini vaqtincha bajaruvchi bosh vazir Sadir Japarov bo‘ldi.
Izoh (0)