Ukrainalik olimlar tomonidan yaratilayotgan koronavirusga qarshi vaksina boshqa vaksinalarga o‘xshamaydi. Bu haqda Ukraina prezidenti Vladimir Zelenskiy mahalliy telekanallarga bergan intervyusida ma’lum qildi, deb yozmoqda “Korrespondent.net”.
Zelenskiyning so‘zlariga ko‘ra, qat’iy karantin choralari iqtisodiyotni butunlay to‘xtatishi mumkin. Shu sababli Ukraina bu choralarni joriy qilmaydi.
Shuningdek, u Ukraina COVID-19’ga qarshi vaksina yaratayotgani hamda u takrorlanmas ekanligini aytgan.
“Biz hammasi haqida gapira olmaymiz, chunki klinik sinovlarni o‘tkazish kerak. Bu pafos emas, populizm emas. U takrorlanmas, chunki u boshqalaridek emas. Bizda materiallar bor, tadqiqotlar olib borildi, biroq odamlarda emas, lekin olib borildi”, — deya ma’lum qilgan Ukraina prezidenti.
Zelenskiy vaksinaning tayyor bo‘lish vaqtini ayta olmagan, biroq boshqa bir davlatda vaksina avvalroq tayyor bo‘lsa, Ukraina har qanday holatda ham uni sotib olishini bildirgan.
Pandemiya boshidan buyon Ukrainada 322 879 kishida COVID-19 aniqlangan. Kasallik oqibatida so‘nggi sutkada 113 kishi, umumiy hisobda esa 6043 kishi vafot etgan. Shuningdek, Ukrainada birinchi marta sutka davomida 7 mingdan ortiq kishida COVID-19 qayd etilgan.
Avvalroq Vladimir Zelenskiy Ukrainada bir kecha-kunduzda kasallanganlar soni 9,5 ming kishidan oshsa, qat’iy cheklovlar joriy qilinishini ma’lum qilgandi.
Izoh (0)