Qirg‘iziston prezidenti vazifasini bajaruvchi Sadir Japarov o‘z xohishi bilan iste’fo bergan sobiq prezident So‘ronbay Jeenbekov haqidagi farmonni imzoladi. Bu haqda “Interfaks” xabar bergan.

Foto: “TASS”

“Qirg‘iziston Respublikasi prezidentining faoliyati va sobiq prezident maqomining kafolatlari to‘g‘risida”gi qonunga muvofiq sobiq davlat rahbariga nisbatan qonunchilikda ko‘zda tutilgan barcha me’yoriy kafolatlar ta’minlanadi.

15-oktabr kuni Jeenbekov 10 kun davom etgan norozilik namoyishlaridan keyin Qirg‘iziston prezidentligi lavozimidan iste’fo bergandi. 16-oktabr kuni parlament majlisida qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etgan. Yakunda bosh vazir Sadir Japarov prezident vazifasini bajaruvchiga aylandi.

Roza Otunboyeva Qirg‘izistonning sobiq prezidenti maqomiga ega yagona mamlakatdagi davlat rahbari, qolganlar – Asqar Akayev, Kurmanbek Bakiyev va Almazbek Atambayev ushbu maqomdan mahrum qilingan.

Qirg‘iziston sobiq prezidenti to‘g‘risidagi qonunga ko‘ra, o‘z lavozim vakolatlari yakuniga yetgan davlat rahbari respublikaning sobiq prezidenti maqomiga ega bo‘ladi. U daxlsiz va vakolatga ega bo‘lgan vaqtida amalga oshirgan harakati yoki harakatsizligi uchun jinoiy javobgarlikka tortilmaydi.

Qonunga ko‘ra, sobiq-prezidentlik maqomi bekor qilinganidan keyin sobiq davlat rahbari parlamentning o‘ta og‘ir jinoyat sodir etganligi yuzasidan bergan ayblovi va mamlakat bosh prokurorining xulosasi asosida jinoiy javobgarlikka tortilishi mumkin.

Sobiq prezidentga Qirg‘iziston hududida davlat himoyasi kafolatlanadi. Sobiq prezidentga nisbatan sudning ayblov hukmi kuchga kirganidan boshlab, u barcha huquq va kafolatlaridan mahrum bo‘ladi.