AQSh Markaziy razvedka boshqarmasining sobiq xodimi Edvard Snouden Rossiyada cheklanmagan muddatga doimiy yashash huquqini oldi. Bu haqda uning advokati Anatoliy Kucherena ma’lum qildi, deb yozmoqda ”Interfaks”.
“Bugun Rossiya migratsiya xizmati Snoudenga Rossiyada muddatsiz asosda doimiy yashash huquqini taqdim etdi”, — deya ma’lum qilgan advokat.
Uning aytishicha, AQShda ta’qib qilingani sababli Rossiyadan boshpana olgan qochqindagi amerikalikka muddatsiz doimiy yashash huquqini taqdim etishga 2019-yilda Rossiyaning migratsiya qonunchiligida yuz bergan o‘zgarishlardan keyin imkoniyat paydo bo‘ldi.
Advokatning bildirishicha, doimiy yashash huquqini olish uchun migratsiya xizmatiga 2020-yilning aprel oyida ariza berilgan. Uning aytishicha, arizani ko‘rib chiqishning bunday uzoq davom etishiga pandemiya sababli joriy qilingan cheklovlar sabab bo‘lgan.
Kucherenaning so‘zlariga ko‘ra, Snouden Rossiya fuqaroligini olish masalasini ko‘rib chiqmayapti.
Eslatib o‘tamiz, Edvard Snouden 2013-yilda ommaviy axborot vositalariga AQSh maxsus xizmatlarining butun dunyoni kuzatuvchi dasturlari haqida ma’lumot taqdim etgan. AQShda Snoudenga nisbatan sirtdan josuslik va davlat mulkini o‘g‘irlash ayblovlari e’lon qilingan.
Snouden dastlab AQShdan Gonkongga, keyin esa Rossiyaga qochib ketgan. Shundan buyon u Rossiyada vaqti-vaqti bilan yashash huquqini uzaytirib yashab kelayotgandi.
Izoh (0)