Fransiyada COVID-19 koronavirus infeksiyasiga chalingan aholining soni milliondan oshdi va mamlakat bu borada Yevropaning ikkinchi davlatiga aylandi. Bu haqda AQShning Jons Hopkins universiteti taqdim qilib kelayotgan statistik ma’lumotlarda qayd etilgan.
Fransiyada 22-oktabr holatiga ko‘ra kasallikka chalinganlar soni 1 000 369 nafarga yetgan, 34 075 kishi infeksiya asoratlari oqibatida hayotdan ko‘z yumgan.
Fransiya bir milliondan ko‘proq aholisida koronavirus aniqlangan dunyoning yettinchi, Yevropa ittifoqining esa ikkinchi davlatiga aylandi. Bir necha kun avval Ispaniyada koronavirus infeksiyasi bilan kasallanganlar soni bir million nafardan oshgandi.
Butun dunyoda koronavirusga chalinganlar soni 41,3 milliondan oshgan, 1,13 million bemor kasallik asoratlari oqibatida vafot etgan, infeksiyadan tuzalganlar soni esa 28 milliondan oshgan. Eng ko‘p kasallanish holatlari AQSh, Hindiston, Braziliya, Rossiya va Argentinada kuzatilmoqda.
21-oktabrda Polsha, Chexiya va Germaniyada COVID-19 bilan kasallanish ko‘rsatkichi bo‘yicha sutkalik antirekord yangilangan, avvalroq Italiyada ham antirekord o‘zgargan. Chexiya Yevropa qit’asida aholi soniga nisbatan olingan kasallanishlar ko‘rsatkichi bo‘yicha yetakchilik qilmoqda.
Izoh (0)