Futbolchilik qoni, het-triklar, Zlatan, Ronaldu va Chempionlar Ligasi. Ulkan vunderkind Erling Holand haqida

Erling Holand futbol olamida shu qadar tez mashhurlikka erishdiki, u haqda millionlar o‘yinini kuzatib boradigan insonlarning deyarli barchasi eshitdi, ko‘rdi va bildi. 2020-yilning qishida “Borussiya”ga o‘tgan Holand o‘zining yetuk hujumchi ekanini har tomonlama isbotlashga erishdi. U o‘zi qatnashgan birorta o‘yinni golsiz tark etmasdi. Uning bu yurishini ko‘pchilik vaqtinchalik deb atadi, biroq Holand hamon gol urishdan to‘xtagani yo‘q. Xo‘sh, kim o‘zi bu vunerkind (bunday deyishga garchi uning gabaritlari yo‘l qo‘ymasa ham, u hali bor-yo‘g‘i 20 yoshda), qayerdan paydo bo‘lib qoldi va kelajakda nimalarga erishishi mumkin. Demak, quyida mana shu savollarga javoblar keltiriladi.

Holand haqida futbolchi va murabbiylar qanday fikrda?

U juda katta salohiyatga ega, oldinda esa ko‘p vaqt bor. Agar u astoydil mehnat qilishda davom etsa, top darajaga ko‘tarila oladi.

Robert Levandovski, “Bavariya” hujumchisi

Ulkan iste’dod va to‘g‘ri mentalitetga ega ajoyib yigit. Qaysi uslubda o‘ynashingizdan qat’i nazar, u doimo ko‘p gol uradi. Holand nihoyatda kuchli, texnikasi va tezligi ham tahsinga loyiqdir.

Jessi Marsh, “Zalsburg” bosh murabbiyi

U aqldan ozgan. Ammo uni yaxshi qiladigan jihat ham aynan shudir.

Maksmilian Veber, “Zalsburg” himoyachisi

Erling yaxshi murabbiy va jamoadoshlarga ega bo‘lishdan juda baxtiyor. U hanuzgacha o‘rganmoqda. U gol urishni yaxshi ko‘radi, ammo kombinatsion o‘yinda ham ancha o‘sishga erishdi. Bu aniq bir sabab bilan emas, balki o‘zining mehnati va yosh futbolchilarga ishonch bildiradigan klub siyosatining ham xizmati”.

Alf-Inge Holand, Erlingning otasi va Norvegiya terma jamoasi sobiq yarim himoyachisi

“U nima qilishni biladigan juda zo‘r yigit. Erling – haqiqiy professional. Men mashg‘ulotlarga birinchilardan bo‘lib kelaman, lekin u allaqachon u yerda shug‘ullanayotgan bo‘ladi, hatto dam olish kunlari ham. U o‘zi uchun nima muhim va foydali ekanligini biladi”.

Roman Byurki, “Borussiya D” darvozaboni

U o‘yinlarda xuddi mashg‘ulotlardagidek o‘ynaydi. Darvozada yonida esa har doim sovuqqonlik bilan harakat qiladi. Biz uning professional munosabatini qadrlaymiz. Bu bizga aynan maydonda kerak bo‘lgan narsa. Holand imkoniyat qay darajada bo‘lishidan qat’i nazar, har doim gol uradi”.

Marko Roys, “Borussiya D” sardori

• Terma jamoa safida: 6 uchrashuv, 6 ta gol;
• Yevrokuboklar doirasidagi o‘yinlarda: 14 uchrashuv, 14 ta gol;
• Milliy chempionatlarda: 73 uchrashuv, 48 ta gol.

“Bryune”

Holand besh yoshidan boshlab mahalliy klubda futbol o‘ynashni boshlaydi va darhol yosh toifasida ko‘tarilishga erishadi. Uning birinchi murabbiyi Alf-Ingve Berntsen Holand haqida shunday deydi: “Uning to‘pga dastlabki ikki teginishi gol bilan yakunlangandi. U ilk soniyalardan boshlab juda yaxshi taassurot qoldirgan”.

Dam olish kunlari Bryunedagi ochiq maydonlarda o‘ynayotganda murabbiylarda iliq taassurot qoldiradi. Yoshlar terma jamoalarida ham, oddiy o‘yinlarda ham u bir xil fidoyilikni namoyish etardi. “Holand hech qachon qo‘rqmasdi, – deydi Berntsen. – U har doim raqiblarini hurmat qilar, lekin ular kim ekanligi bilan umuman qiziqmasdi”.

“Molde”

Holand ma’lum vaqt o‘tgach, “Molde”ga ko‘chib o‘tadi, u yerda esa uni Ole-Gunnar Sulsher shug‘ullantiradi. 2018-yilning 1-iyulida Erling Norvegiya chempionati yetakchisi “Brann”ga  qarshi o‘yinning dastlabki 21 daqiqasida poker qayd etadi. “U eng yaxshi hujumchi bo‘lish uchun yetarlicha imkoniyatga ega”, – degandi o‘shanda “Manchester Yunayted”ning hozirgi ustozi.

“Molde” tarkibidagi ikkinchi mavsumida Erling 25 uchrashuv o‘tkazib, 12 ta gol urishga erishadi. Sulsher esa uni Romelu Lukaku bilan taqqoslab, shunday degandi: “Unga katta qiziqish bo‘lmoqda. Bizda katta-katta klublardan yaxshi takliflar bo‘ldi. Biroq biz ularni rad etmoqdamiz”.

“Zalsburg”

Ancha jiddiy klublarning qiziqishiga qaramay, Holand soddagina “Zalsburg” bilan shartnoma imzoladi. Buning sababi esa muntazam o‘yin amaliyotiga ega bo‘lish edi. Munas Dabburning ajoyib o‘yini tufayli Holand 2018/19-yilgi mavsumda unchalik ham tez-tez ko‘rinish bermadi. Kelasi yiliga esa u o‘z imkoniyatidan to‘liq foydalanib, Xese Marsh boshchiligidagi tarkibning o‘zagiga aylandi.

U Chempionlar Ligasidagi “Bryugge”ga qarshi debyut o‘yinida het-trik qayd etgani haqiqiy sensatsiya sifatida baholangandi. Bundan tashqari, u keyingi to‘rtta o‘yinda ham raqib darvozasini ishg‘ol etib, Chempionlar Ligasining ketma-ket beshta o‘yinida gol urgan birinchi o‘spiringa aylandi. Mazkur het-trik o‘sha kuzdagi beshtaning biri edi, xolos.

U shunchalik yaxshi o‘ynadiki, uni kimsan “Borussiya” o‘z safiga qo‘shib oldi. “Zalsburg” bosh direktori Kristof Froynd uning klubdan ketishi haqida shunday degandi: “Biz Erlingni yo‘qotishni xohlamagandik. Ammo 2019-yilning iyulidan dekabrigacha u shunchalik g‘ayrioddiy va ajoyib yutuqlarni ko‘rsatdiki, buni hatto taxmin qilib ham bo‘lmasdi”.

Avstriyadan ketish oldidan u mamlakatning 2019-yildagi  eng yaxshi futbolchisi deb topilgandi. “O‘n yil ichidagi eng yosh va birinchi chet ellik bo‘lish – bu alohida yutuqdir. Bu men uchun sharaf”, – degandi Holland bu yutug‘i haqida.

“Borussiya D”

Holand 2020-yilning 18-yanvarida “Borussiya” safida debyut qiladi. U zaxiradan o‘yinga qo‘shilib, het-trik qayd etadi. Uning jamoasi “Augsburg”ni 5:3 hisobida mag‘lub etgandi. Yangi klubidagi dastlabki to‘rtta o‘yinida Holand sakkizta gol urishga erishadi.

Chempionlar Ligasi 1/6 bosqichida PSJga qarshi kechgan  bellashuvda esa o‘z nomiga ikkita gol yozdirib qo‘yadi va musobaqadagi gollari sonini o‘ntaga yetkazib oladi. 2019/20-yilgi mavsumda to‘purarlar poygasida faqatgina Robert Levandovski 15 ta gol bilan uni ortda qoldirdi.

Norvegiya terma jamoalari (turli yosh toifalarida)

2019-yili Polshada bo‘lib o‘tgan U-20 Jahon Chempionatida garchi Norvegiya guruhdan chiqa olmagan bo‘lsa-da, Holand musobaqaning “Oltin butsa”sini qo‘lga kiritadi. U Gondurasga qarshi kechgan bahsda (12:0) 9 ta gol uradi. “Men 10 ta gol urishim kerak edi. Muvaffaqiyatsizlikka uchraganimdan afsusdaman. Ammo to‘qqizta ham yomon natija emas”, – degandi o‘shanda Holand. Ikki oydan so‘ng, Erling 2019-yilning sentabr oyida Norvegiya terma jamoasida debyut qiladi.

Milliy jamoadagi birinchi het-trikini esa 2020-yilning 11-oktabriga kelib, Millatlar Ligasi doirasida o‘tkazilgan Ruminiyaga qarshi o‘yinda (4:0) amalga oshiradi. Bunga Holand o‘z repertuarida quyidagi izoh berdi: “Men besh-oltita gol urishim kerak edi”.

U haqida siz bilmagan ma’lumotlar

Erling Angliyada tug‘ilgan, uning otasi Alf-Inge yaqinda Premyer Ligaga chiqqan “Lids”da to‘p surgan. Holand uch yoshga to‘laganida otasi jarohat tufayli faoliyatini yakunlaydi va oilasi bilan Norvegiyaga qaytadi. 17 yoshga to‘lganida esa Erling o‘zini “Lids” muxlisi deb ataydi va u bilan Premyer Ligada g‘alaba qozonishni orzusi ekanini aytgan.

Holand bir vaqtlar Krishtianu Ronaldu bilan uchrashishni orzu qilishini aytgan edi: “Men u bilan uchrashishni va uning sharofati bilan futbolchiga aylanganimni aytishni istardim. U doim menga o‘rnak bo‘lib kelgan”.

Shuningdek, u “Suonsi” sobiq hujumchisi Michuning ashaddiy muxlisi bo‘lgan. Holand “Bryune”da o‘ynab yurgan paytlarda Instagram fotosuratlarida o‘zini Michu sifatida belgilardi. Bundan tashqari, u yaqinda Twitter’da ham ispaniyalik futbolchiga bo‘lgan hurmatini izhor etdi.

Holand budilnik sifatida Chempionlar Ligasi madhiyasidan foydalanadi. “Men har kuni ushbu musiqa ostida uyg‘onaman va bundan aslo zerikmayman”.

Holand o‘zi haqida qanday fikrda?

“OAVning e’tibori juda katta. Ammo bu yaxshi bosim. Klub yaxshi harakat qilmoqda, bu meni biroz himoya qiladi. Kelajakda u meni yanada ko‘proq himoya qiladi deb umid qilaman. Qiyin bo‘ladi, lekin biz harakat qilamiz. Men himoyalanishni istayman”.

“Men futbolni yaxshi ko‘radigan xotirjam yigitman. Oilamni yaxshi ko‘raman, u bilan ko‘p vaqt o‘tkazaman. Hozirgi hayotim – mashg‘ulotlar, o‘yin va futboldan zavq olish. Hozircha ishlar shu yo‘sinda davom etmoqda”.

U yana nimaga erishishi mumkin?

Otasidan ko‘proq narsaga erishish. Holand bir vaqtlar shunday degandi: “Maqsadim – otamga qaraganda yaxshiroq futbolchi bo‘lish. Umid qilamanki, terma jamoada undan ham ko‘proq o‘ynayman”. Katta Holand terma jamoada 34 ta o‘yin o‘tkazgan.

Skandinaviyaning eng mashhur futbolchisiga aylanish. Hozirda Henrik Larsson Skandinaviya vakillari orasida klublar miqyosidagi UEFA musobaqalarining eng yaxshi to‘purari hisoblanadi (59 ta gol). Shuningdek, Holand Zlatan Ibragimovichni ham kumirlaridan biri deb biladi va uning natijalarini yangilashni xohlaydi. Shvetsiyalik futbolchining UEFA klublar miqyosidagi gollari 57 taga, Shvetsiya termasidagi esa 62 taga teng. Holand Ibra haqida shunday deydi: “Men uchun Zlatan eng zo‘ri. U Skandinaviyadan, shuning uchun uning o‘rnini kimdir egallashi kerak”.