Футболчилик қони, ҳет-триклар, Златан, Роналду ва Чемпионлар Лигаси. Улкан вундеркинд Эрлинг Ҳоланд ҳақида

Эрлинг Ҳоланд футбол оламида шу қадар тез машҳурликка эришдики, у ҳақда миллионлар ўйинини кузатиб борадиган инсонларнинг деярли барчаси эшитди, кўрди ва билди. 2020 йилнинг қишида «Боруссия»га ўтган Ҳоланд ўзининг етук ҳужумчи эканини ҳар томонлама исботлашга эришди. У ўзи қатнашган бирорта ўйинни голсиз тарк этмасди. Унинг бу юришини кўпчилик вақтинчалик деб атади, бироқ Ҳоланд ҳамон гол уришдан тўхтагани йўқ. Хўш, ким ўзи бу вунеркинд (бундай дейишга гарчи унинг габаритлари йўл қўймаса ҳам, у ҳали бор-йўғи 20 ёшда), қаердан пайдо бўлиб қолди ва келажакда нималарга эришиши мумкин. Демак, қуйида мана шу саволларга жавоблар келтирилади.

Ҳоланд ҳақида футболчи ва мураббийлар қандай фикрда?

У жуда катта салоҳиятга эга, олдинда эса кўп вақт бор. Агар у астойдил меҳнат қилишда давом этса, топ даражага кўтарила олади.

Роберт Левандовски, «Бавария» ҳужумчиси

Улкан истеъдод ва тўғри менталитетга эга ажойиб йигит. Қайси услубда ўйнашингиздан қатъи назар, у доимо кўп гол уради. Ҳоланд ниҳоятда кучли, техникаси ва тезлиги ҳам таҳсинга лойиқдир.

Жесси Марш, «Зальцбург» бош мураббийи

У ақлдан озган. Аммо уни яхши қиладиган жиҳат ҳам айнан шудир.

Максмилиан Вебер, «Зальцбург» ҳимоячиси

Эрлинг яхши мураббий ва жамоадошларга эга бўлишдан жуда бахтиёр. У ҳанузгача ўрганмоқда. У гол уришни яхши кўради, аммо комбинацион ўйинда ҳам анча ўсишга эришди. Бу аниқ бир сабаб билан эмас, балки ўзининг меҳнати ва ёш футболчиларга ишонч билдирадиган клуб сиёсатининг ҳам хизмати».

Алф-Инге Ҳоланд, Эрлингнинг отаси ва Норвегия терма жамоаси собиқ ярим ҳимоячиси

«У нима қилишни биладиган жуда зўр йигит. Эрлинг – ҳақиқий профессионал. Мен машғулотларга биринчилардан бўлиб келаман, лекин у аллақачон у ерда шуғулланаётган бўлади, ҳатто дам олиш кунлари ҳам. У ўзи учун нима муҳим ва фойдали эканлигини билади».

Роман Бюрки, «Боруссия Д» дарвозабони

У ўйинларда худди машғулотлардагидек ўйнайди. Дарвозада ёнида эса ҳар доим совуққонлик билан ҳаракат қилади. Биз унинг профессионал муносабатини қадрлаймиз. Бу бизга айнан майдонда керак бўлган нарса. Ҳоланд имконият қай даражада бўлишидан қатъи назар, ҳар доим гол уради».

Марко Ройс, «Боруссия Д» сардори

• Терма жамоа сафида: 6 учрашув, 6 та гол;
• Еврокубоклар доирасидаги ўйинларда: 14 учрашув, 14 та гол;
• Миллий чемпионатларда: 73 учрашув, 48 та гол.

«Брюне»

Ҳоланд беш ёшидан бошлаб маҳаллий клубда футбол ўйнашни бошлайди ва дарҳол ёш тоифасида кўтарилишга эришади. Унинг биринчи мураббийи Алф-Ингве Бернцен Ҳоланд ҳақида шундай дейди: «Унинг тўпга дастлабки икки тегиниши гол билан якунланганди. У илк сониялардан бошлаб жуда яхши таассурот қолдирган».

Дам олиш кунлари Брюнедаги очиқ майдонларда ўйнаётганда мураббийларда илиқ таассурот қолдиради. Ёшлар терма жамоаларида ҳам, оддий ўйинларда ҳам у бир хил фидойиликни намойиш этарди. «Ҳоланд ҳеч қачон қўрқмасди, – дейди Бернцен. – У ҳар доим рақибларини ҳурмат қилар, лекин улар ким эканлиги билан умуман қизиқмасди».

«Молде»

Ҳоланд маълум вақт ўтгач, «Молде»га кўчиб ўтади, у ерда эса уни Оле-Гуннар Сульшер шуғуллантиради. 2018 йилнинг 1 июлида Эрлинг Норвегия чемпионати етакчиси «Бранн»га  қарши ўйиннинг дастлабки 21 дақиқасида покер қайд этади. «У энг яхши ҳужумчи бўлиш учун етарлича имкониятга эга», – деганди ўшанда «Манчестер Юнайтед»нинг ҳозирги устози.

«Молде» таркибидаги иккинчи мавсумида Эрлинг 25 учрашув ўтказиб, 12 та гол уришга эришади. Сульшер эса уни Ромелу Лукаку билан таққослаб, шундай деганди: «Унга катта қизиқиш бўлмоқда. Бизда катта-катта клублардан яхши таклифлар бўлди. Бироқ биз уларни рад этмоқдамиз».

«Зальцбург»

Анча жиддий клубларнинг қизиқишига қарамай, Ҳоланд соддагина «Зальцбург» билан шартнома имзолади. Бунинг сабаби эса мунтазам ўйин амалиётига эга бўлиш эди. Мунас Даббурнинг ажойиб ўйини туфайли Ҳоланд 2018/19 йилги мавсумда унчалик ҳам тез-тез кўриниш бермади. Келаси йилига эса у ўз имкониятидан тўлиқ фойдаланиб, Хесе Марш бошчилигидаги таркибнинг ўзагига айланди.

У Чемпионлар Лигасидаги «Брюгге»га қарши дебют ўйинида ҳет-трик қайд этгани ҳақиқий сенсация сифатида баҳоланганди. Бундан ташқари, у кейинги тўртта ўйинда ҳам рақиб дарвозасини ишғол этиб, Чемпионлар Лигасининг кетма-кет бешта ўйинида гол урган биринчи ўспиринга айланди. Мазкур ҳет-трик ўша куздаги бештанинг бири эди, холос.

У шунчалик яхши ўйнадики, уни кимсан «Боруссия» ўз сафига қўшиб олди. «Зальцбург» бош директори Кристоф Фройнд унинг клубдан кетиши ҳақида шундай деганди: «Биз Эрлингни йўқотишни хоҳламагандик. Аммо 2019 йилнинг июлидан декабригача у шунчалик ғайриоддий ва ажойиб ютуқларни кўрсатдики, буни ҳатто тахмин қилиб ҳам бўлмасди».

Австриядан кетиш олдидан у мамлакатнинг 2019 йилдаги  энг яхши футболчиси деб топилганди. «Ўн йил ичидаги энг ёш ва биринчи чет эллик бўлиш – бу алоҳида ютуқдир. Бу мен учун шараф», – деганди Ҳолланд бу ютуғи ҳақида.

«Боруссия Д»

Ҳоланд 2020 йилнинг 18 январида «Боруссия» сафида дебют қилади. У захирадан ўйинга қўшилиб, ҳет-трик қайд этади. Унинг жамоаси «Аугсбург»ни 5:3 ҳисобида мағлуб этганди. Янги клубидаги дастлабки тўртта ўйинида Ҳоланд саккизта гол уришга эришади.

Чемпионлар Лигаси 1/6 босқичида ПСЖга қарши кечган  беллашувда эса ўз номига иккита гол ёздириб қўяди ва мусобақадаги голлари сонини ўнтага етказиб олади. 2019/20 йилги мавсумда тўпурарлар пойгасида фақатгина Роберт Левандовски 15 та гол билан уни ортда қолдирди.

Норвегия терма жамоалари (турли ёш тоифаларида)

2019 йили Польшада бўлиб ўтган U-20 Жаҳон Чемпионатида гарчи Норвегия гуруҳдан чиқа олмаган бўлса-да, Ҳоланд мусобақанинг «Олтин бутса»сини қўлга киритади. У Гондурасга қарши кечган баҳсда (12:0) 9 та гол уради. «Мен 10 та гол уришим керак эди. Муваффақиятсизликка учраганимдан афсусдаман. Аммо тўққизта ҳам ёмон натижа эмас», – деганди ўшанда Ҳоланд. Икки ойдан сўнг, Эрлинг 2019 йилнинг сентябрь ойида Норвегия терма жамоасида дебют қилади.

Миллий жамоадаги биринчи ҳет-трикини эса 2020 йилнинг 11 октябрига келиб, Миллатлар Лигаси доирасида ўтказилган Руминияга қарши ўйинда (4:0) амалга оширади. Бунга Ҳоланд ўз репертуарида қуйидаги изоҳ берди: «Мен беш-олтита гол уришим керак эди».

У ҳақида сиз билмаган маълумотлар

Эрлинг Англияда туғилган, унинг отаси Алф-Инге яқинда Премьер Лигага чиққан «Лидс»да тўп сурган. Ҳоланд уч ёшга тўлаганида отаси жароҳат туфайли фаолиятини якунлайди ва оиласи билан Норвегияга қайтади. 17 ёшга тўлганида эса Эрлинг ўзини «Лидс» мухлиси деб атайди ва у билан Премьер Лигада ғалаба қозонишни орзуси эканини айтган.

Ҳоланд бир вақтлар Криштиану Роналду билан учрашишни орзу қилишини айтган эди: «Мен у билан учрашишни ва унинг шарофати билан футболчига айланганимни айтишни истардим. У доим менга ўрнак бўлиб келган».

Шунингдек, у «Суонси» собиқ ҳужумчиси Мичунинг ашаддий мухлиси бўлган. Ҳоланд «Брюне»да ўйнаб юрган пайтларда Instagram фотосуратларида ўзини Мичу сифатида белгиларди. Бундан ташқари, у яқинда Twitter’да ҳам испаниялик футболчига бўлган ҳурматини изҳор этди.

Ҳоланд будилник сифатида Чемпионлар Лигаси мадҳиясидан фойдаланади. «Мен ҳар куни ушбу мусиқа остида уйғонаман ва бундан асло зерикмайман».

Ҳоланд ўзи ҳақида қандай фикрда?

«ОАВнинг эътибори жуда катта. Аммо бу яхши босим. Клуб яхши ҳаракат қилмоқда, бу мени бироз ҳимоя қилади. Келажакда у мени янада кўпроқ ҳимоя қилади деб умид қиламан. Қийин бўлади, лекин биз ҳаракат қиламиз. Мен ҳимояланишни истайман».

«Мен футболни яхши кўрадиган хотиржам йигитман. Оиламни яхши кўраман, у билан кўп вақт ўтказаман. Ҳозирги ҳаётим – машғулотлар, ўйин ва футболдан завқ олиш. Ҳозирча ишлар шу йўсинда давом этмоқда».

У яна нимага эришиши мумкин?

Отасидан кўпроқ нарсага эришиш. Ҳоланд бир вақтлар шундай деганди: «Мақсадим – отамга қараганда яхшироқ футболчи бўлиш. Умид қиламанки, терма жамоада ундан ҳам кўпроқ ўйнайман». Катта Ҳоланд терма жамоада 34 та ўйин ўтказган.

Скандинавиянинг энг машҳур футболчисига айланиш. Ҳозирда Ҳенрик Ларссон Скандинавия вакиллари орасида клублар миқёсидаги УЕФА мусобақаларининг энг яхши тўпурари ҳисобланади (59 та гол). Шунингдек, Ҳоланд Златан Ибрагимовични ҳам кумирларидан бири деб билади ва унинг натижаларини янгилашни хоҳлайди. Швециялик футболчининг УЕФА клублар миқёсидаги голлари 57 тага, Швеция термасидаги эса 62 тага тенг. Ҳоланд Ибра ҳақида шундай дейди: «Мен учун Златан энг зўри. У Скандинавиядан, шунинг учун унинг ўрнини кимдир эгаллаши керак».