Rossiyada 11-oktabr holatiga ko‘ra ortda qolgan bir sutka ichida koronavirus bilan kasallanish bo‘yicha 13 643 ta yangi holat kuzatildi. Bu haqda mamlakatdagi koronavirusga qarshi kurash bo‘yicha tezkor shtab xabar bergan.
“Rossiyada bir sutka ichida 13 mingtadan ziyod kasallanish holati kuzatildi va bu epidemiya boshlanganidan beri kuzatilmagan hodisa”, — deb yozmoqda “Interfaks”.
Moskvada kasallanish holatlarining sutkalik o‘sish ko‘rsatkichi 11-oktabr holatiga ko‘ra may oyi o‘rtalaridan beri antirekord darajasiga chiqdi — 4501 kishida COVID-19 borligi tasdiqlandi.
“Bir sutka ichida 994 nafar bemorda COVID-19 tasdiqlangan va ular kasalxonalarga yotqizilgan. Bir hafta davomida kasalxonalarga yotqizilgan bemorlar soni avvalgi haftadagidan 12 foizga ko‘p”, — deyiladi tezkor shtab axborotida.
Rossiyada epidemiya boshlanganidan buyon 1,3 million nafar kishi koronavirusga chalindi va 22,6 ming kishi infeksiya asoratlari oqibatida vafot etdi. Rospotrebnadzor ma’lumotlariga ko‘ra, 11-oktabr holati bo‘yicha Rossiyada 50,7 millionta COVID-19 testi amalga oshirilgan.
10-oktabrda Rossiyada bir sutkada 12 846 kishida COVID-19 aniqlangan va kunlik antirekord yangilangandi. Uch kun avval 7-oktabrda esa Rossiyada bir sutkada 202 kishi COVID-19’dan vafot etgan va bu iyul oyidan buyon kuzatilgan antirekord hisoblanadi.
Izoh (0)