Minskda hibsda saqlanayotgan belarus bloger Sergey Tixanovskiy to‘rt oy ichida birinchi marta uning rafiqasi, Belarus muxolifati rahbari Svetlana Tixanovskaya bilan suhbatlashishga muvaffaq bo‘ldi, deya xabar bermoqda Meduza.
“Hozirgina Svetlana va Sergey Tixanovskiy o‘rtasida telefon orqali suhbat bo‘lib o‘tdi. Bu 134 kun ichida birinchi o‘zaro suhbat hisoblanadi”, – deyiladi Tixanovskaya Telegram kanalida.
Svetlana Tixanovskayaning maslahatchisi Franak Vyachorkaning ta’kidlashicha, suhbat davomida ular bolalar va Sergey Tixanovskiyning hibsda saqlanishi haqida gaplashgan. Tixanovskiy rafiqasini “kuchliroq bo‘lishga” va dunyo rahbarlari bilan uchrashishni davom ettirishga chaqirdi. Vyachorka, suhbat paytida kimdir Tixanovskiyning yonida bo‘lgan deb hisoblaydi.
https://youtu.be/RsR0zixcBYk
Eslatib o‘tamiz, Belarusda 9-avgust kuni bo‘lib o‘tgan saylovlarni soxtalashtirish haqidagi ma’lumotlar fonida norozilik namoyishlari boshlandi va haligacha davom etmoqda. Namoyishchilar Lukashenkoni saylovni soxtalashtirishda ayblamoqda. Saylov natijalariga ko‘ra, Aleksandr Lukashenko 80 foiz ovoz to‘plagan.
Belarus Markaziy saylov komissiyasi ma’lumotlariga ko‘ra, Svetlana Tixanovskaya prezidentlik saylovida 10,1 foiz ovoz to‘plagan. Tixanovskayaning o‘zi esa mag‘lubiyatini tan olmadi va o‘zini “Belarus xalqi tomonidan saylangan yagona yetakchi” deb atadi. Saylovdan ikki kun o‘tgach Tixanovskaya Litvaga chiqib ketgan. Uning safdoshlari Tixanovskaya hukumat bosimi ostida mamlakatdan chiqib ketganini ma’lum qilgan.
Muxolifat Belarusda yangi saylovlar o‘tkazish va konstitutsiyaviy islohotlarni talab qilmoqda.
Sobiq prezidentlikka nomzod Svetlana Tixanovskayaning tarafdorlari 18-avgust kuni yangi saylovlar o‘tkazish orqali mamlakatda hokimiyatni tranzit qilish maqsadida Muvofiqlashtiruvchi kengash tuzdi. Belarus bosh prokurori Aleksandr Konyukning ta’kidlashicha, Muxolifat Muvofiqlashtirish kengashi faoliyati konstitutsiyaga qarshi va hokimiyatni qo‘lga olishga qaratilgan.
Kengashning tashkil etilishi munosabati bilan Jinoyat kodeksining 361-moddasi bilan jinoyat ishi qo‘zg‘atilib, uning doirasida Muvofiqlashtiruvchi kengashning bir nechta vakillari hibsga olingan.
Belarus prezidenti Aleksandr Lukashenko 10-oktabr kuni esa Davlat xavfsizlik qo‘mitasi tergov hibsxonasida Muvofiqlashtiruvchi kengash va muxolifatning qo‘shma shtabining hibsga olingan vakillari bilan uchrashdi.
Izoh (0)