Россияда 11 октябрь ҳолатига кўра ортда қолган бир сутка ичида коронавирус билан касалланиш бўйича 13 643 та янги ҳолат кузатилди. Бу ҳақда мамлакатдаги коронавирусга қарши кураш бўйича тезкор штаб хабар берган.
«Россияда бир сутка ичида 13 мингтадан зиёд касалланиш ҳолати кузатилди ва бу эпидемия бошланганидан бери кузатилмаган ҳодиса», — деб ёзмоқда «Интерфакс».
Москвада касалланиш ҳолатларининг суткалик ўсиш кўрсаткичи 11 октябрь ҳолатига кўра май ойи ўрталаридан бери антирекорд даражасига чиқди — 4501 кишида COVID-19 борлиги тасдиқланди.
«Бир сутка ичида 994 нафар беморда COVID-19 тасдиқланган ва улар касалхоналарга ётқизилган. Бир ҳафта давомида касалхоналарга ётқизилган беморлар сони аввалги ҳафтадагидан 12 фоизга кўп», — дейилади тезкор штаб ахборотида.
Россияда эпидемия бошланганидан буён 1,3 миллион нафар киши коронавирусга чалинди ва 22,6 минг киши инфекция асоратлари оқибатида вафот этди. Роспотребнадзор маълумотларига кўра, 11 октябрь ҳолати бўйича Россияда 50,7 миллионта COVID-19 тести амалга оширилган.
10 октябрда Россияда бир суткада 12 846 кишида COVID-19 аниқланган ва кунлик антирекорд янгиланганди. Уч кун аввал 7 октябрда эса Россияда бир суткада 202 киши COVID-19’дан вафот этган ва бу июль ойидан буён кузатилган антирекорд ҳисобланади.
Изоҳ (0)