AQSh prezidenti Donald Tramp ortiq koronavirus infeksiyasi tashuvchisi emas. Bu haqda The New York Times nashri prezidentning davolovchi shifokori Shon Konlining so‘zlariga asoslanib xabar tarqatdi.
Konlining so‘zlariga ko‘ra, Trampning holati AQSh kasalliklar nazorati markazining amaldagi standartlariga muvofiq uni karantindan chiqarishga imkon beradi.
Biroq gazeta Trampning COVID-19’ga topshirgan testining manfiy natija ko‘rsatgani yuzasidan Konlining aniq izoh bermaganini qayd etgan.
AQSh prezidenti 10-oktabrdan saylovoldi kampaniyasiga qayta kirishgan.
“O‘zimni juda yaxshi his etyapman”, — degan Tramp Oq uy ayvonidan turib Janubiy maysazorda to‘plangan saylovchilarga qilgan murojaatida.
Bu Tramp COVID-19 bilan kasallangani e’lon qilinganidan keyingi birinchi ommaviy chiqishi bo‘ldi.
“Biz saylovoldi ommaviy tadbirlariga kirishyapmiz, shu sababli ham mamlakatimizning sotsialistik davlatga aylanishiga yo‘l qo‘ymasligimiz zarur”, — deya ta’kidlagan Tramp o‘z nutqida.
Donald Trampda COVID-19 koronavirus infeksiyasi borligi aniqlanganidan keyin u uch kun (3 – 5-oktabr kunlari) davomida Uolter Rid harbiy gospitalida davolandi. Shifokorlar Trampni Regeneron Pharmaceuticals kompaniyasining preparati (REGN-COV2 antitanachalar kokteyli), shuningdek, Bloomberg nashrining yozishicha, “sink, D vitamini, Famotidin, melatonin va aspirin bilan davolashgan.
Trampning o‘zi ham kasallikning erta bosqichida shifokorlarga murojaat qilgani hamda Regeneron kompaniyasining preparati vositasida tuzalganini aytgan.
“Menimcha, shifoxonaga dastlabki alomatlar kuzatilganida, ya’ni o‘z vaqtida murojaat qilish juda muhim”, — deya ta’kidlagan AQSh yetakchisi Fox’ga bergan intervyusida.
Iyul oyida Tramp iyunda Oklaxomada o‘tgan mitingdan keyin koronavirusga chalinganlar soni keskin oshib ketgani tufayli saylovoldi uchrashuvlarni o‘tkazmaslik tarafdori ekanini bildirgan. Tramp o‘z tarafdorlari bilan telefon orqali onlayn uchrashishni istashini ta’kidlagan.
Izoh (0)