Bir oy ichida Moskvada COVID-19 bilan kasallanish besh martaga ko‘paydi. Koronavirus kasalxonalarida nimalar bo‘lmoqda? Shifokorlar aytishicha, vaziyat keskinlashmoqda, bemorlar uchun joylar esa tugamoqda

Bir oy ichida Moskvada kasallanish holatlari besh martadan ko‘proq o‘sdi. Kasalxonalarga eng og‘ir bemorlar yotqizilmoqda

Birinchi to‘lqin chog‘ida poytaxtda cho‘qqiga 7-may kuni chiqilgan edi — o‘shanda Moskvada 6703 ta yangi holat qayd etilgan. Iyul boshiga kelib, kasallanish kamaydi va sentabr o‘rtalarigacha kuniga 700 ta holatdan kam ko‘rsatkich saqlanib turdi. So‘ng keskin o‘sish kuzatildi: 6-oktabr kuni 4082 ta, 7-oktabrda — 3229 ta, 8-oktabrda — 3323 ta holat qayd etildi, deb yozadi Meduza.

Boshqa hududlarda kasallanish holatlari ancha kam. Masalan, Peterburgda (Rossiya hududlari ichida ikkinchi o‘rin) 8-oktabr kuni 461 kishi, Moskva viloyatida — 433 kishi koronavirus yuqtirgan.

Shunday o‘sish kuzatilayotgan bir paytda Moskva ma’murlari cheklovlarni qaytara boshladi. 65 yoshdan oshganlar, surunkali kasalliklari bor odamlar va homilador ayollarga ular yana uyda o‘tirishni qat’iy tavsiya qildi, ish beruvchilarga nafaqat ishchilarining kamida 30 foizini uyda ishlashga jalb qilish, balki ularning avtomobillari, telefonlari va “Troyka” kartalari raqamlarini taqdim etish mas’uliyatini yukladi. Maktab o‘quvchilari uchun odatdagi bir haftalik o‘rniga, ikki haftalik ta’til e’lon qilindi. Maktab o‘quvchilari va pensionerlar uchun ijtimoiy kartalar amal qilishi to‘xtatildi.

Har kuni Moskvada taxminan 1000 kishi kasalxonaga yotqiziladi, bir hafta ichida bunday holatlar 13 foizga o‘sdi. Moskvadagi tez yordam xizmatining uch xodimi, ism-shariflarini e’lon qilmaslik sharti bilan, nashrga ma’lum qilishicha, so‘nggi haftalarda tez yordam brigadalariga yuklama 2-3 marta oshib ketgan. Shuningdek, tez yordamdagi yana ikki manbaning aytishicha, hozir faqat og‘irga yaqin holatdagi bemorlar kasalxonaga yotqizilmoqda. Biroz bo‘lsa-da bo‘sh joylar qoldirish maqsadida, qolganlarga uyda davolanish tavsiya etilmoqda.

Moskva sog‘liqni saqlash departamentidagi nashr manbasi ham ushbu ma’lumotni tasdiqlab, ayni paytda faqat saturatsiya — qonning kislorod bilan to‘yinganlik darajasi tushib ketgan, xavf guruhidagi bemorlar kasalxonaga yotqizilayotganini aytdi.

Tez yordamdagi manbalar qo‘shimcha qilishicha, vrachlar kasalni olib ketishga qaror qilganida, dispetcherga qo‘ng‘iroq qilib, kasalxonaga yotqizish masalasini muvofiqlashtirib olishi kerak. Bunday dispetcherlar yetishmasligi tufayli, ularning javobini 40-60 daqiqacha kutishga to‘g‘ri keladi. Bunday uzoq kutishlardan keyin ba’zan dispetcherlar kasalxonaga yotqizishni rad etadi.

Moskvadagi shunga o‘xshash muammolar haqida 8-oktabr kuni “Kommersant” ham yozgan edi. Ta’kidlanishicha, bemorlar kompyuter tomografiyasiga tushish uchun bir necha soatlab kutmoqda.

Kasalxonalardagi vaziyat bahordagi holatni eslata boshladi. Shifokorlar ikkinchi to‘lqin birinchisidan ancha yomonroq bo‘lishidan qo‘rqmoqda

Meduza Moskvadagi asosiy COVID-19 kasalxonalari xodimlari bilan suhbatlashdi.

Kommunarkadagi manbaning aytishicha, so‘nggi vaqtlarda kasalxonadagi bemorlar soni ikki marta oshgan va ularning ko‘pchiligi birinchi to‘lqin bemorlaridan ko‘ra ancha og‘ir holatda. “Kasallar tobora ko‘paymoqda. Ayniqsa, reanimatsiyadagi va sun’iy nafas oldirish apparatidagilar”, — dedi kasalxona bosh shifokori Denis Protsenko. 7-oktabr holatiga ko‘ra, kasalxonada 645 nafar bemor davolangan, 104 nafari reanimatsiya bo‘limida, 22 nafari sun’iy nafas oldirish apparatidada. Hozircha kasalxonada joy yetarli — bemorlarni qabul qilish uchun qo‘shimcha xonalar ochilmoqda.

Kasalxona yaqinida tez yordamlardan iborat navbat tizila boshlagan. Protsenko buni bemorlar soni o‘sgani bilan izohladi. “Holatning qanday tezlik bilan chuqurlashayotgani odamni hushyor torttiradi”, — dedi u.

15-kasalxona bosh shifokori Valeriy Vechorko ham joriy vaziyatning bahordagiga yaqinlashib qolganini ta’kidladi. Bemorlar soni oshgani, joylarning 80 foizi bandligi, kasalxonaga yotqizilganlar soni apreldagiga qariyb teng bo‘lganini, shuningdek, reanimatsiyaga tushayotgan og‘ir bemorlar ham ko‘payganini aytdi.

Meduza’ning kasalxonadagi manbasi vaziyatni “tang” deb baholadi. “Kuniga 200 tadan odam olib kelishmoqda, ularni yotqizishga deyarli joy yo‘q. Shunday tendensiya bor: so‘nggi hafta yoshlarni keltirishdi, ustiga-ustak, ular juda og‘ir ahvolda… Norasmiy buyruq bo‘yicha bizga faqat og‘ir bemorlar keltirilmoqda, aks holda to‘lib qolardik”, — deya qo‘shimcha qildi u. Uning qayd etishicha, Sokolniki va Krilatskiyda vaqtinchalik gospitallarning ochilishi yuklamani biroz kamaytirishga yordam bermoqda — ularni Sergey Sobyanin 5-oktabr kuni ochishga qaror qilgan edi.

52-kasalxonadagi nashr manbasi hamkasblarining gapiga qo‘shildi. Uning aniqlik kiritishicha, iyul—avgustda kasalxona 50-60 foizga to‘lgan bo‘lsa, hozir deyarli 80 foizga to‘lgan, reanimatsiya bo‘limlari bundan ham to‘laroq. “Bo‘limlarda yuklama bahordagidek emas, buning asosiy sababi shundaki, ko‘p jarayonlar odatiyroq va tushunarliroq bo‘lib qoldi”, — dedi yana bir shifokor.

52-kasalxonadagi manbaning qayd etishicha, bemorlar soni oshayotgan bir paytda, shifokorlar ham kasallik yuqtirishda davom etmoqda. “Reanimatsiyada 6-8 ta bemoring bo‘lib turganida 24 soatlik smenani to‘liq o‘rangan holatda, ko‘zoynak va qo‘lqoplarni yechmasdan o‘tkazish qiyin”, — dedi u.

Bemorlarning aytishicha, kasalxonadagi xodimlar og‘ir kasallar oqimi tufayli “juda horg‘in va holdan toygan”. “Ko‘pchilik bemorlarda kasallik juda og‘ir kechadi, ularni kislorodga ulashadi, osma ukollar qo‘yishadi”, — deya aniqlik kiritdi ular.

Meduza suhbatlashgan vrachlardan biri ta’kidlashicha, barcha shaharliklar o‘zlari kasalxonaga tushmagunicha, koronavirus bilan ishi yo‘q. Bunday munosabat tufayli, shuningdek, Moskvada qat’iyroq choralar joriy qilinmayotgani sababli, shifokorlar ikkinchi to‘lqin birinchisidan ancha og‘ir bo‘ladi, deb hisoblamoqda.

Mansabdorlar iqtisodiyot tufayli Moskvani karantinga yopishni istamayapti. Ikkinchi to‘lqinning cho‘qqisi esa dekabrgacha kutilmoqda

Oddiy kasalxonalarni bahordagidek koronavirus kasalxonalariga aylantirish amaliyoti muvaffaqiyatsiz deb topildi, dedi Meduza’ning Moskva sog‘liqni saqlash departamentidagi manbasi. Chunki buning natijasida boshqa kasalliklar bilan og‘rigan bemorlar rejali yordamsiz qolib ketadi. Bundan tashqari, koronavirusdan boshqa bo‘limlari ham bor bo‘lgan kasalxonalarda COVID-19 avj olishi xavfi yuqoriroq.

Oxir-oqibat, hozir vaqtinchalik kasalxonalarga urg‘u berilmoqda. Oddiy kasalxonalar esa keskin vaziyatda COVID-19’ga moslashtiriladi. “Bugungi kunda tibbiy quvvatlarning zarur zaxiralariga egamiz. Lekin keling, ochiq gapiramiz — koykalar soni doim uchma-uch, qanchalik yelib-yugurmaylik, bir kun kelib ular tugaydi”, — degan edi Moskva meri o‘rinbosari Anastasiya Rakova “Rossiya 1” kanaliga bergan intervyusida.

Shu bilan birga, Meduza’ning federal hukumatdagi hamsuhbatining aytishicha, hukumat koronavirusning ikkinchi to‘lqini davomida biznesni yopmaslik uchun maksimal darajada harakat qilish haqida siyosiy qaror qabul qilgan. Hozir hukumat 18-oktabr kuni Moskva maktablarida e’lon qilingan uzaytirilgan ta’til tugashini kutmoqda, shunda u pandemiya rivojlanishiga qanday ta’sir qilgani baholanadi. Agar ta’til paytida Moskvada kasallanganlar soni bo‘yicha statistika pasaysa yoki, hech bo‘lmaganda, barqarorlashsa, jiddiy cheklovlar kiritilmaydi. Kasallanganlar soni o‘sishda davom etsa, birinchi navbatda savdo markazlari, yirik do‘konlar va kinoteatrlar yopilishi mumkin. Bundan tashqari, meriyada va federal hukumatda yirik ommaviy tadbirlarni qayta taqiqlash muhokama qilinmoqda.

Meduza’ning hukumatdagi manbasi so‘zlariga ko‘ra, mansabdorlar ekspertlar (aynan qanday ekspertlar ekanligi noma’lum)ning baholariga tayanmoqda. Unga ko‘ra, optimistik ssenariy bo‘yicha, ikkinchi to‘lqindagi kasallanish cho‘qqisi oktabr oxiriga, pessimistik ssenariy bo‘yicha esa — dekabr boshiga to‘g‘ri keladi.

Keyinroq Moskva sog‘liqni saqlash departamenti ushbu maqolaga munosabat bildirib, “poytaxtda rejali va shoshilinch yordam to‘liq hajmda ko‘rsatilayotgani”ni, shaharda esa “koyka fondining katta zaxirasi” yaratilganini aytdi. Tez yordam dispetcherlari bemorlarni kasalxonaga yotqizishni rad etayotgani haqidagi gaplarni asossiz deb atadi. “Ahvoli shuni taqozo etadigan bemorlarni shahardagi tibbiyot tashkilotlariga yo‘naltirishda hech qanday cheklovlar yo‘qligini ta’kidlaymiz”, — deya qo‘shib qo‘yishdi departamentda.