Rossiyada so‘nggi sutkada 12 846 kishida COVID-19 aniqlanib, kunlik kasallanish bo‘yicha rekord yangilandi, deb xabar bermoqda Meduza. Avvalgi rekord bundan bir kun avval qayd etilgan, 12 126 kishida koronavirus aniqlangandi.
Koronavirusga qarshi kurash bo‘yicha tezkor shtab ma’lumotlariga ko‘ra, Rossiyada COVID-19’ga chalinganlarning umumiy soni 1 285 084 nafarga yetdi.
Eng ko‘p kasallanish holati Moskva (+4105 kishi), Sankt-Peterburg (+501 kishi) va Moskva viloyatida (+416 nafar) qayd etilgan.
Sutka davomida koronavirus infeksiyasidan 197 kishi, epidemiya boshlanganidan buyon esa 22 454 kishi vafot etgan. So‘nggi bir kecha-kunduzda 6781 kishi, mamlakatda virus tarqalishi boshlanganidan buyon esa 1 016 202 kishi sog‘aygan.
“Rospotrebnadzor” ma’lumotlariga ko‘ra, mamlakatda qatorasiga ikki kun koronavirusni aniqlash bo‘yicha yarim milliondan ko‘p — 648 mingta test o‘tkazilgan. Umumiy hisobda esa bunday testlardan 50,3 milliondan ortiq o‘tkazilgan.
Eslatib o‘tamiz, 4-oktabr kuni Rossiyada may oyidan beri ilk bor bir sutkada 10 mingdan ortiq kishida COVID-19 aniqlandi. Shunday buyon kunlik kasallanishlar soni keskin ortib bormoqda. Shunday sharoitda Rossiya kasalxonalarida koronavirus bilan og‘rigan bemorlar uchun joylar tugamoqda, tez yordamni soatlab, ba’zan kunlab kutishmoqda.
Mamlakat poytaxtida kasallanish holat eng ko‘p bo‘lgani tufayli Moskvada tibbiyot oliygohlari talabalari COVID-19’ga qarshi kurashish uchun kasalxonalarga chaqirilmoqda.
“Rospotrebnadzor” rahbari Anna Popova Rossiyada kasallanishning ortishini yilning sovuq mavsumi boshlangani bilan bog‘lagan. Shuningdek, bunga ta’sir qiluvchi omillar qatoriga fuqarolarning ta’tildan va ishga qaytganligini kiritgan.