AQSh Federal qidiruv byurosi yangi fitna fosh qilingani haqida xabar berdi, uning ishtirokchilari Michigan shtati gubernatori Gretxen Uitmerni o‘g‘irlab ketishni rejalashtirgan, deb yozadi Meduza.
Tekshiruv doirasida AQSh Ko‘ngillilar qo‘shini harakati g‘oyasiga qo‘shilgan 13 kishi hibsga olingan. FQB talqiniga ko‘ra, ular 200 ga yaqin kishini yollab, shtat kapitoliysi binosiga shiddatli hujum qilishni hamda mansabdorlarni, shu jumladan, gubernator Uitmerni garovga olishni, so‘ng ularni “davlatga xiyonat” uchun sud qilishni rejalashtirgan.
Ko‘ngillilar qo‘shinining rejalari haqidagi ma’lumotni FQB o‘sha guruhga kiritilgan yashirin agentdan olgan. Agent ularning Kapitoliyga avtomatik quroldan va Molotov kokteyllaridan foydalanib hujum qilish hamda taktik tayyorgarlik bo‘yicha mashg‘ulotlar o‘tkazish haqidagi gaplarini yozib olgan. Ayblanuvchilar, shuningdek, gubernator qarorgohini kuzatib, uning kun tartibini o‘rgangan hamda portlovchi modda sotib olish uchun pul yig‘gan.
Gumonlanuvchilar umrbod ozodlikdan mahrum qilinishi mumkin.
Michiganda koronavirus pandemiyasi davrida AQSh shtatlari orasidagi eng qat’iylaridan biri bo‘lgan cheklov choralari joriy qilindi, uyda o‘z-o‘zini yakkalash va harakatlanishni cheklash shular jumlasidandir. Shu tufayli Gretxen Uitmer radikallar tomonidan bir necha marta to‘g‘ridan to‘g‘ri tahdidlarga uchragan.
Izoh (0)