AQShda prezidentlik debatlari bo‘yicha komissiya Donald Tramp va Jo Bayden o‘rtasidagi ikkinchi debatni onlayn formatda o‘tkazishga qaror qildi. Bu haqda Meduza xabar berdi.
Ikkinchi debat 15-oktabr kuni bo‘lib o‘tadi. Tramp va Baydenga savollarni avval rejalashtirilganidek Washington Journal siyosiy tok-shou boshlovchisi Stiv Skalli beradi.
Jo Baydenning jamoasi debatda uning formati qanday bo‘lishidan qat’i nazar ishtirok etishga tayyorligini ma’lum qildi. O‘z navbatida, Tramp “onlayn debatda ishtirok etish uchun vaqtini sarflamoqchi emasligini, buning o‘rniga o‘z kampaniyasi doirasida boshqa tadbirlarga e’tibor qaratishini” aytdi.
Eslatib o‘tamiz, Donald Trampda 1-oktabr kuni koronavirus aniqlandi. AQSh prezidenti bir necha kun kasalxonada davolandi va u yerdan 5-oktabr kuni chiqdi. U og‘ir ahvoldagi bemor sifatida davolangani haqida xabar berildi, biroq Trampning o‘zi ham, uni davolayotgan shifokorlar ham prezident o‘zini yaxshi his qilayotganini bildirgan.
Birinchi debat 29-sentabr kuni bo‘lib o‘tdi. Ko‘plab tahlilchilar debatni “tarixdagi eng yomoni” deya tavsifladi — nomzodlar o‘z dasturlariga deyarli hech qanday e’tibor qaratmadi, buning o‘rniga ular doimiy ravishda bir-birini haqorat qildi va gapini bo‘lib qo‘ydi.
Izoh (0)