Lavash ichida ajoyib ta’mga ega palov tayyorlab ko‘ring

Ushbu taom palov hamda lavashni xush ko‘radiganlar uchun ayni muddao!

Kerakli mahsulotlar:

• Guruch – 3 stakan;
• Sariyog‘ – 200 gr;
• Qo‘y go‘shti – 1 kg;
• Piyoz – 400 gr;
• Quritilgan zaytun – 150 gr;
• Turshak – 100 gr;
• Mayiz – 100 gr;
• Za’faron – bir chimdim;
• Tuz – ta’bga ko‘ra;
• Suv – 5 litr;
• O‘simlik yog‘i – ta’bga ko‘ra;
• Bodom – 50 gr;
• Lavash xamiri – 4 dona.

1. Bir litr suvga bir osh qoshiq tuz solinib, guruch 2–3 daqiqa davomida ivitiladi;
2. Go‘sht o‘rtacha bo‘laklarga bo‘linib, o‘simlik yog‘ida qovuriladi;
3. Piyoz alohida qovuriladi;
4. Go‘sht, piyoz, mayiz, bodom va turshak aralashtiriladi. 5 daqiqaga qo‘yiladi;
5. Yarim stakan qaynagan suvga bir chimdim za’faron solinadi. 20 daqiqaga dimlanib, so‘ng suzib olinadi;
6. Sariyog‘ eritib olinadi;
7. Ivitilgan guruch yaxshilab yuvilib, tuzlangan suvda yarim pishgunga qadar qaynatiladi. Guruch suzib olinadi va idishdagi suv bo‘shatiladi. Unga guruch, eritilgan sariyog‘ hamda za’faron qo‘shiladi va aralashtiriladi;
8. Pech 180 darajada oldindan qizdiriladi;
9. Hajmi 2,5 litrli idishning ichi eritilgan sariyog‘ yordamida yog‘lanadi;
10. Lavash xamirining bir qismi idishdan chiqib turgan holda joylashtiriladi va uning chet qismlariga eritilgan sariyog‘ surib chiqiladi.
11. Xamir ustiga avval guruch, go‘shtli massalar ketma-ketlikda joylashtiriladi va yana oxirida guruchli qatlam yoyiladi;
12. Lavashning qoldirilgan chet qismi bilan guruch yuzasi yopiladi va ustki qismiga sariyog‘ surtiladi.
13. 1 soat davomida pechda pishiriladi;
14. Tayyor bo‘lgan taom pichoq bilan bo‘laklanib, idishlarda tortiladi.