Bosh vaziri Abdulla Aripov ishtirokida So‘x tumanida bo‘lib o‘tgan faollari yig‘ilishida 2020-yil 8-avgustda qabul qilingan “2020—2021-yillarda Farg‘ona viloyatining So‘x tumanini kompleks ijtimoiy-iqtisodiy rivojlantirish chora-tadbirlari to‘g‘risida”gi Prezident qarorida belgilab berilgan vazifalar muhokama etildi. Bu haqda So‘x tumani hokimligi axborot xizmati xabar qilgan.
Xabarda qayd etilishicha, Prezident topshirig‘i asosida So‘x tumanidagi muammolarni hal etishga e’tibor qaratilib, har bir mahalla, har bir xonadon o‘rganib chiqilgan.
Aholi, yoshlarning bandligini ta’minlash bo‘yicha amalga oshirilgan ishlar natijasida uch mingdan ortiq ishsizlarning bandligini ta’minlashga erishilgan. 345 nafar fuqaro Toshkent shahridagi yirik qurilish tashkilotlariga, 995 nafar kishi tumandagi muaassasalarga doimiy ishga joylashtirilgan.
Ichki yo‘llarni ta’mirlash uchun 18 milliard so‘m mablag‘ sarflangan. 15 mingdan ortiq iste’molchilarning elektr ta’minoti yaxshilangan. 20 kilometr ichimlik suvi tarmog‘i tortilgan. Hududlarda aloqa sifatini yaxshilash maqsadida 74 kilometrli optik tola tarmog‘i tortilib, 5 ta baza stansiyasi o‘rnatilgan. Hushyor massividagi foydalanilmayotgan 200 gektar maydon o‘zlashtirilgan.
8-avgustda qabul qilingan Prezident qarori esa bu ishlarning mantiqiy davomi bo‘ladi. Qaror bilan tasdiqlangan 2020—2021-yillarda So‘x tumanini kompleks ijtimoiy-iqtisodiy rivojlantirish chora-tadbirlarining manzilli dasturiga 146 ta loyiha kiritilgan va uning ijrosiga 639 millirad so‘m mablag‘ sarf etiladi.
Yig‘ilishda mazkur ishlar natijasida 11 mingdan ortiq aholi uchun yangi ish o‘rinlari yaratilishi ko‘zda tutilgani, sanoat, xizmatlar va qishloq xo‘jaligini rivojlantirish bo‘yicha 95 ta loyihani amalga oshirish hisobiga 5000 ta yangi ish o‘rni yaratilishi ta’kidlagan.
Shuningdek, qarorda Yo‘l-transport, muhandislik-kommunikatsiya va ijtimoiy infratuzilmani rivojlantirish borasida 160 kilometr shag‘al qoplamali yo‘llarni sementobeton qoplamaga o‘tkazish va asfalt qoplama yotqizish, 106 kilometr tuproq yo‘llarni shag‘al qoplamaga o‘tkazish va 40 kilometr sementobeton piyodalar yo‘laklarini qurish belgilangan.
Bosh vazir rahbarligida o‘tgan yig‘ilishda respublika ishchi guruhi tomonidan mutasaddi rahbarlar ishtirokida dastur doirasida amalga oshirilayotgan har bir loyihanining o‘z muddatida va sifatli amalga oshirilishini ta’minlash va bajarilgan ishlarni muntazam muhokama qilib borish topshirildi.
Ma’lumot uchun, 31-may kuni O‘zbekistonning So‘x tumani Chashma qishlog‘i va Qirg‘izistonning Qadamjoy tumani Chechme qishlog‘i aholisi o‘rtasida Qirg‘iziston hududida joylashgan, suvidan O‘zbekiston ham foydalanadigan Chashma bulog‘i ustida bahs chiqib, katta mojaroga aylanib ketgan. So‘x tumani hokimligi ma’lumotlariga ko‘ra, hodisa oqibatida 187 nafar o‘zbekistonlik tan jarohati olgan, O‘zbekiston hududidagi uchta xonadonda yong‘in chiqqan. Qirg‘izistonning Botken viloyatida uy va omborxona yonib ketgan.
Ushbu holat yuzasidan 1-iyun kuni O‘zbekiston bosh vaziri Abdulla Aripov O‘zbekiston—Qirg‘iziston chegarasida qo‘shni mamlakat hukumati rahbari bilan uchrashdi. Bundan tashqari, Prezident Shavkat Mirziyoyev Qirg‘iziston prezidenti So‘ronboy Jeenbekov bilan telefon orqali muloqot qildi.
Mazkur voqealar ortidan O‘zbekiston hukumati a’zolari hududdagi muammolarni o‘rganish uchun 2-iyun kuni u yerga tashrif buyurdi. So‘x tumaniga yangi hokim va ichki ishlar bo‘limiga yangi rahbar tayinlandi.
Shundan so‘ng tumanga bo‘lgan e‘tibor sezilarli darajada kuchaydi. Xususan, Farg‘ona viloyati So‘x tumaniga zamonaviy tibbiyot uskunalari yetkazib berildi, elektr ta’minotini yaxshilash uchun 79 kilometr uzunlikdagi elektr uzatish kabellari yuborildi, 230 nafar so‘xlik Tashkent City’dagi qurilish ishlarida qatnashish uchun olib kelinishi ma’lum qilindi, tumanda 3 ta dam olish maskani yaratilishi ta’kidlandi, 71 km optik tolali aloqa kabellari tortildi va 5 ta mobil aloqa baza stansiyalari o‘rnatildi va so‘xlik bitiruvchilarga OTMlarga kirishda 500 ta davlat granti kvotasi ajratildi.
Izoh (0)