O‘zbekiston—Qirg‘iziston davlat chegarasi “Chashma” uchastkasida 31-may kuni ikki mamlakat chegaradosh hududlari aholisi o‘rtasida mahalliy darajadagi hodisa yuz bergan edi.

“Voqea sabablarini ikki tomon rasmiy shaxslari o‘rganishi shuni ko‘rsatdiki, ‘Chashma’ bulog‘ining ariqlarini birgalikda tozalash paytida yuzaga kelgan bahslashuv natijasida ikki mamlakatning ayrim fuqarolari o‘rtasida mojaro kelib chiqqan”, — deya xabar bermoqda O‘zbekiston TIV matbuot xizmati.

Hodisa natijasida ikki tomondan ham jabrlanganlar bor; TIVning qo‘shimcha qilishicha, ularga zarur tibbiy yordam ko‘rsatilgan. Qirg‘iziston Sog‘liqni saqlash vazirligi ma’lumotlariga ko‘ra, chegaradagi mojarodan so‘ng 25 kishi Ayderken shahridagi kasalxonaga yotqizilgan.

“Ikki kishi reanimatsiyada, ular operatsiyadan keyingi ahvoli shifokorlar tomonidan og‘ir deb baholanmoqda. Ikki kishi jarrohlik bo‘limiga yotqizilgan, ahvoli o‘rtacha og‘irlikda”, — deyiladi qo‘shni mamlakat vazirligi axborotida.

O‘zbekiston fuqarolari orasida jabrlanganlar, mojaro oqibatida yetgan zarar ko‘lami to‘g‘risida hozircha ma’lumotlar mavjud emas.