Toshkent viloyatida qiymati 91,5 mln so‘mlik qo‘chqorlarni o‘g‘irlagan shaxs qo‘lga olindi

Toshkent viloyatida 61 ta qo‘chqorni va 5 qop yemni o‘g‘irlagan shaxs ushlandi, deb xabar bermoqda Tergov departamenti.

Ma’lum qilinishicha, 2020-yilning 28-iyundan 15-iyul kuniga qadar bo‘lgan vaqt mobaynida 45 yoshli Z.M. 28 yoshli A.B. bilan o‘zaro oldindan jinoiy til biriktirgan. Ular o‘zi yollanma ishchi sifatida ishlayotgan 38 yoshli N.T.ning Bo‘stonliq tumani Xondoyliq qishlog‘ida joylashgan fermer xo‘jaligiga qarashli yaylov yer maydonidan, erkin holatda o‘tlab yurgan jami bahosi 91 500 000 so‘mlik 61 bosh qo‘chqorlarni va narxi 750 000 so‘m bo‘lgan 5 qop yemni yashirin ravishda o‘g‘irlab ketgan.

Olib borilgan tezkor qidiruv harakatlari natijasida, Z.M. va A.B. mazkur jinoyatni sodir etganliklari aniqlanib, protsessual tartibda ushlangan.

Mazkur holat yuzasidan Bo‘stonliq tumani IIB huzuridagi Tergov bo‘limi tomonidan Jinoyat kodeksining 169-moddasi 3-qismi “v” bandi (o‘g‘rilik) bilan jinoyat ishi qo‘zg‘atilgan. O‘g‘irlangan 61 bosh qo‘chqor ashyoviy dalil tariqasida olingan. Xabarda narxi 750 000 so‘m bo‘lgan 5 qop yem haqida hech qanday ma’lumot berilmagan.

Jinoyat ishi yuzasidan Z.M. va A.B. ayblanuvchi tariqasida jalb qilinib, ularga nisbatan “qamoqqa olish” tarzidagi ehtiyot chorasi qo‘llanilgan.

Dastlabki tergov harakatlari davom ettirilmoqda.