Toshkentdagi 1973-yilda qurilgan Bet Menaxem markaziy sinagogasi buzilmaydigan bo‘ldi. Absolute Business Trade xususiy korxonasi da’vo arizasini qaytarib olgan. Bu haqda Din ishlari bo‘yicha qo‘mita ma’lum qildi.
Ma’lum qilinishicha, Toshkent shahri sobiq hokimi Rahmonbek Usmonovning (hozirda Yunusobod tuman hokimi) 2017-yil 11-sentabrdagi qarori bilan Absolute Business Trade Mirobod va Nukus ko‘chalari kesishmasidagi 6 gektar yerda birinchi qavatlarida savdo obyektlari va turli xizmatlarni o‘z ichiga olgan ko‘p qavatli uylarni qurish huquqini qo‘lga kiritgan.
Mazkur hududda joylashgan binolar kompensatsiya to‘langan holda buzib tashlanishi kerak bo‘lgan. Gap 13, 15 va 17-sonli uylar haqida ketmoqda. 1998-yili davlat ro‘yxatidan o‘tgan Toshkent shahar Yevropa yahudiylari diniy jamoasi 15-sonli uyda joylashgan. Binoning o‘zi esa 1929-yilda qurilgan.
Pudratchi yahudiylar diniy jamoasi bilan kelisha olmay iyun oyida Toshkent shahar tumanlararo iqtisodiy sudiga da’vo arizasi bilan murojaat qilgan edi.
5-avgust kuni bo‘lib o‘tgan sud majlisida Absolute Business Trade Yevropa yahudiylari diniy jamoasiga qarashli yer maydoniga egalik qilish bo‘yicha kiritgan da’vo arizasini qaytarib olgan.
“Gazeta.uz”ning yozishicha, Buxoro yahudiylarining Toshkentdagi diniy jamoasi raisi, Konfessiya ishlari bo‘yicha kengash a’zosi Arkadiy Isaxarv sud qarorini olqishlagan.
“Diniy tashkilotning yer uchastkasiga egalik qilish bilan bog‘liq barcha da’volar bekor qilinib, da’vogar — Absolute Business Trade xususiy korxonasi da’vo arizasini qaytarib olganligini ma’muniyat bilan qabul qildik. Bu o‘z faoliyatini O‘zbekiston hududida rasman amalga oshirayotgan diniy tashkilotga qarshi sudga ariza berilgan birinchi holat hisoblanadi, umid qilamanki, oxirgisi ham shu bo‘ladi”, — Arkadiy Isaxarov.
Uning ta’kidlashicha, Din ishlari bo‘yicha qo‘mita yahudiylarning diniy tashkilotiga har tomonlama — huquqiy va ma’naviy yordam ko‘rsatgan.
Absolute Business Trade haqida
Korxonalar va tashkilotlarning yagona davlat registridagi ma’lumotlarga ko‘ra, Absolute Business Trade kompaniyasi 2012-yilning oktabrida ro‘yxatdan o‘tgan va u turar joy binolarini qurish bilan shug‘ullanadi. Uning muassasi va rahbari sifatida Payzullajon Mirzayev ko‘rsatilgan.
Payzullajon Mirzayev, shuningdek, Golden House Development muassislari qatoriga kiritilgan boshqa bir qurilish kompaniyasining — Unique Trade Business muassisi va rahbari hisoblanadi. Bundan tashqari, u Darvoza Savdo’ning (Makro supermarketlar tarmog‘i) 10 foiziga, Mall Estate’ning (noturar joy binolari bilan shug‘ullanuvchi) 51,19 foiziga, DSK Binokor kompaniyasining (beton mahsulotlarini ishlab chiqaruvchIi) 17,8 foiziga va boshqa qator kompaniyalarga egalik qiladi.
2019-yil 30-avgustda Prezidentning farmoni bilan Payzullajon Mirzayev “Mehnat shuhrati” ordeni bilan taqdirlangan.
Izoh (0)