Bog‘chalar faoliyatini qayta tiklash uchun tayyorgarlik ko‘rilayotgani ma’lum qilindi

Maktabgacha ta’lim tashkilotlarida koronavirus infeksiyasi pandemiyasi sababli to‘xtatilgan faoliyat jarayonini tiklashga tayyorgarlik ishlari olib borilmoqda, deb xabar bermoqda Maktabgacha ta’lim vazirligi axborot xizmati.

Ma’lum qilinishicha, bog‘chalar faoliyatini tiklashdan maqsad, xodimlar va tarbiyalanuvchilar uchun xavfsiz muhitni ta’minlash orqali, bolalarni normal maishiy hayot, o‘yinlar va ta’lim jarayoniga qaytarishdir.

Bunda virus tarqalishi va uni yuqtirib olish xavfini bartaraf etish maqsadida joriy etilgan taqiq choralarini hisobga olgan holda, qo‘shimcha xavfsizlik choralari ham tatbiq etilishi ko‘zda tutilgan. Ammo, bolalar o‘rtasidagi oraliq masofa, ularning ijtimoiy faolligi, amaliy mashg‘ulotlari va rivojlantiruvchi o‘yinlariga xalaqit bermasligi lozimligi ta’kidlangan

Maktabgacha ta’lim vazirligi BMT Bolalar jamg‘armasi YuNISEFning ko‘magida pandemiya sharoitida MTTlarda ish jarayoni qanday tamoyillar asosida tashkil etilishi tasvirlangan videorolik tayyorladi. Unda maktabgacha ta’lim muassasasi pandemiya vaqtida faoliyatni tashkil etish borasida ko‘rsatmalar berilgan. Xususan:

– bolalar bog‘chasi yashil yoki sariq hududda bo‘lishi kerak;

– xodimlar koronavirus tarqalishining oldini olish bo‘yicha o‘qitilgan bo‘lishi lozim;

– bog‘cha binosi va hududi dezinfeksiya qilinishi shart;

– maktabgacha ta’lim tashkilotida uzluksiz suv ta’minoti tizimi yoki yetarli miqdorda suv zaxirasi bo‘lishi shart;

– har bir guruh uchun bolalarning bog‘chaga kelishi jadvali bo‘lishi kerak;

– har dushanba kuni ota-onalar paketga solingan bir martalik qog‘oz sochiqlar yoki ko‘p marta ishlatiladigan beshta toza sochiqlar, ishlatilgan sochiqlar uchun alohida paketlar olib kelishlari kerak;

– bog‘chaga kelayotgan bolalarda tibbiy niqob bo‘lishi va kirish joyida 2 metrlik ijtimoiy masofa saqlanishi zarur;

– bog‘chaga o‘yinchoqlar, oziq-ovqat mahsulotlari va ichimliklar olib kelish taqiqlanadi.

Ta’kidlanishicha, MTT xodimlari bog‘chaga kelgan tarbiyalanuvchilarning tana haroratini o‘lchab, ma’lumotlarni yozib borishlari talab etiladi. Agar bolada yoki MTT xodimida isitma, yo‘tal yoki o‘tkir respiratorli infeksiyalarning boshqa belgilari bo‘lsa, ularni bog‘chaga kiritish mumkin emas. Agar bolaning tana harorati normada bo‘lsa, uning qo‘llari dezinfeksiya qilinib bog‘chaga kiritiladi. Ota-onalarning bog‘cha hududiga kirishlariga yo‘l qo‘yilmaydi.

Videoda bog‘chadagi har bir guruhda 15 nafardan ko‘p bola bo‘lmasligi tavsiya qilingan. Shuningdek, mashg‘ulotlar va ovqatlanish vaqtida bolalar orasida kamida 1 metrlik masofa ta’minlashini shartligi ta’kidlangan.

https://www.youtube.com/watch?v=Fih2xWl2Hzg&feature=youtu.be

Avvalroq, O‘zbekistonda bolani bog‘chaga joylashtirish uchun ariza berish xizmati qayta ishga tushirilgani haqida xabar berilgan edi.