Тошкентдаги 1973 йилда қурилган Бет Менахем марказий синагогаси бузилмайдиган бўлди. Absolute Business Trade хусусий корхонаси даъво аризасини қайтариб олган. Бу ҳақда Дин ишлари бўйича қўмита маълум қилди.
Маълум қилинишича, Тошкент шаҳри собиқ ҳокими Раҳмонбек Усмоновнинг (ҳозирда Юнусобод туман ҳокими) 2017 йил 11 сентябрдаги қарори билан Absolute Business Trade Миробод ва Нукус кўчалари кесишмасидаги 6 гектар ерда биринчи қаватларида савдо объектлари ва турли хизматларни ўз ичига олган кўп қаватли уйларни қуриш ҳуқуқини қўлга киритган.
Мазкур ҳудудда жойлашган бинолар компенсация тўланган ҳолда бузиб ташланиши керак бўлган. Гап 13, 15 ва 17-сонли уйлар ҳақида кетмоқда. 1998 йили давлат рўйхатидан ўтган Тошкент шаҳар Европа яҳудийлари диний жамоаси 15-сонли уйда жойлашган. Бинонинг ўзи эса 1929 йилда қурилган.
Пудратчи яҳудийлар диний жамоаси билан келиша олмай июнь ойида Тошкент шаҳар туманлараро иқтисодий судига даъво аризаси билан мурожаат қилган эди.
5 август куни бўлиб ўтган суд мажлисида Absolute Business Trade Европа яҳудийлари диний жамоасига қарашли ер майдонига эгалик қилиш бўйича киритган даъво аризасини қайтариб олган.
«Gazeta.uz»нинг ёзишича, Бухоро яҳудийларининг Тошкентдаги диний жамоаси раиси, Конфессия ишлари бўйича кенгаш аъзоси Аркадий Исахарв суд қарорини олқишлаган.
«Диний ташкилотнинг ер участкасига эгалик қилиш билан боғлиқ барча даъволар бекор қилиниб, даъвогар — Absolute Business Trade хусусий корхонаси даъво аризасини қайтариб олганлигини маъмуният билан қабул қилдик. Бу ўз фаолиятини Ўзбекистон ҳудудида расман амалга ошираётган диний ташкилотга қарши судга ариза берилган биринчи ҳолат ҳисобланади, умид қиламанки, охиргиси ҳам шу бўлади», — Аркадий Исахаров.
Унинг таъкидлашича, Дин ишлари бўйича қўмита яҳудийларнинг диний ташкилотига ҳар томонлама — ҳуқуқий ва маънавий ёрдам кўрсатган.
Absolute Business Trade ҳақида
Корхоналар ва ташкилотларнинг ягона давлат регистридаги маълумотларга кўра, Absolute Business Trade компанияси 2012 йилнинг октябрида рўйхатдан ўтган ва у турар жой биноларини қуриш билан шуғулланади. Унинг муассаси ва раҳбари сифатида Пайзуллажон Мирзаев кўрсатилган.
Пайзуллажон Мирзаев, шунингдек, Golden House Development муассислари қаторига киритилган бошқа бир қурилиш компаниясининг — Unique Trade Business муассиси ва раҳбари ҳисобланади. Бундан ташқари, у Darvoza savdo'нинг (Makro супермаркетлар тармоғи) 10 фоизига, Mall Estate’нинг (нотурар жой бинолари билан шуғулланувчи) 51,19 фоизига, ДСК Бинокор компаниясининг (бетон маҳсулотларини ишлаб чиқарувчи) 17,8 фоизига ва бошқа қатор компанияларга эгалик қилади.
2019 йил 30 августда Президентнинг фармони билан Пайзуллажон Мирзаев «Меҳнат шуҳрати» ордени билан тақдирланган.
Изоҳ (0)