“Avtosantrans-servis” MChJ tomonidan Xitoydan xarid qilingan avtobuslar Toshkentda eski Isuzu’lar o‘rnini egallaydi. Bu haqda “Toshshahartransxizmat” AJ xabar berdi.
Hozirda “Toshshahartransxizmat” AJ tizimida 10 ga yaqin xususiy korxonalar yo‘lovchi tashish bilan shug‘ullanadi. Ta’kidlanishicha, ular tomonidan yo‘nalishlarga qo‘yilgan avtobuslarning asosiy qismi xizmat muddatini o‘tab bo‘lgan transport vositalar.
Toshkent shahar transport boshqarmasi tomonidan ana shu jihatlar inobatga olinib, xususiy korxonalar oldiga o‘z harakat tarkibini yangilash vazifasi qo‘yilgan.
Ma’lum qinishicha, “Avtosantrans-servis” MChJ 9 ta yangi avtobus xarid qilgan. Xitoyning Yutong Hongkong limited kompaniyasi tomonidan ishlab chiqarilgan mazkur avtobuslar gaz yoqilg‘isida harakatlanadi. Bu atrof-muhitga yetadigan zararning kamayishiga olib kelish bilan birga, muqobil yoqilg‘i turlaridan keng foydalanish imkonini beradi. Qolaversa, gazning suyuq yoqilg‘iga nisbatan bir necha barobar arzonligi korxonaning iqtisodiy samaradorligiga ham ijobiy ta’sir o‘tkazadi.
Umumiy 52 nafar yo‘lovchiga mo‘ljallangan ushbu avtobuslar o‘rta sig‘imli bo‘lib, 30 ta o‘rindiqqa ega.
Ishlab chiqaruvchi korxona ushbu transport vositalarining 150 ming kilometrgacha benuqson harakatlanishiga kafolat bermoqda.
Ushbu avtobuslar poytaxt yo‘llarida qatnayotgan xususiy korxonaga tegishli eski Isuzu rusumidagi avtobuslar o‘rnida harakatlanishi rejalashtirilgan.
Ma’lumot uchun, “Avtosantrans-servis” MChJ “Toshshahartransxizmat” AJ tizimidagi xususiy korxonalardan biri hisoblanadi.
Eslatib o‘tamiz, Toshkent hokimi Jahongir Ortiqxo‘jayev va “Belkommunmash” rahbari Vladimir Korol o‘rtasida 2018-yil sentabrida bo‘lib o‘tgan muzokaralar yakuniga ko‘ra, Belarus elektrobuslaridan birini Toshkentda sinab ko‘rish bo‘yicha kelishuvga erishilgan edi. 450 ming dollarga xarid qilingan birinchi elektrobus Toshkentda 13-sentabrdan harakatlanishni boshlagandi. Toshkent shahar hokimligi bunday elektrobuslar soni 10 ta yetkazilishini ma’lum qilgan. Shu yilning mart oyidan boshlab esa Toshkentning 52-avtobus yo‘nalishi (Beshyog‘och—Yunusobod) bo‘ylab Xitoyning Yutong elektrobusi sinov tariqasida qatnay boshlagandi.
Izoh (0)