Shavkat Mirziyoyev viloyatlarda koronavirusga ixtisoslashgan shifoxonalar tashkil etish bo‘yicha topshiriq berdi

O‘zbekiston Prezidenti Shavkat Mirziyoyev raisligida 28-iyul kuni hududlarda koronavirus bilan bog‘liq murakkab vaziyatni tartibga solish bo‘yicha ko‘rilayotgan choralar muhokamasi yuzasidan videoselektor yig‘ilishi o‘tkazildi. Bu haqda Prezident matbuot xizmati xabar berdi.

Qayd etilishicha, mamlakatda oxirgi besh kunda infeksiya yuqtirganlar soni 3 mingtaga ko‘payib, 21 700 nafarga yetdi. Jumladan, Toshkent viloyatida 347 ta, Qashqadaryoda 193 ta, Surxondaryoda 130 ta, Samarqandda 123 ta, Sirdaryoda 83 ta, Andijonda 79 ta yangi kasallanganlar aniqlangan. Buxoro, Farg‘ona, Samarqand, Namangan, Toshkent, Xorazm viloyatlarida va Qoraqalpog‘istonda pnevmoniya holatlari ancha ko‘paygan.

Respublika maxsus komissiyasiga joylardagi epidemiologik vaziyatni barqarorlashtirish va kasallarni davolashga amaliy yordam beradigan guruhlar tuzib, har bir hududga yuborish bo‘yicha ko‘rsatma berildi.

Ushbu guruhlarga mutasaddi idoralar, ixtisoslashgan tibbiyot markazlari hamda tibbiyot oliy o‘quv yurtlari rahbar va mutaxassislari, shuningdek, nafaqadagi tajribali shifokorlar jalb etiladi. Bu hududlarda aholiga erta va aniq tashxis qo‘yish, bemorlarni kasallik darajasiga qarab to‘g‘ri va malakali davolashda muhim omil bo‘ladi.

Hokimliklarga koronavirusga ixtisoslashgan shifoxonalar tashkil etish, intensiv va reanimatsiya o‘rinlarini ko‘paytirish, ularni zarur tibbiy jihozlar va dori-darmon bilan ta’minlash vazifasi qo‘yildi. Toshkent shahridagi tajriba asosida COVID-19 va pnevmoniya bilan kasallanganlarga dastlabki malakali tibbiy yordam ko‘rsatadigan maxsus poliklinikalar tashkil etish zarurligi ta’kidlandi.

Davlat rahbari og‘ir kasallar ahvolini yengillashtiradigan tibbiy uskunalar ta’minoti masalasiga alohida to‘xtaldi.

Qayd etilishicha, oxirgi ikki haftada qo‘shimcha ravishda 370 ta sun’iy nafas oldirish apparati, 1041 ta portativ nafas oldirish uskunasi, 1164 ta kislorod konsentratori va boshqa zarur tibbiy jihozlar olib kelinib, hududlarga tarqatildi. Kasallar ko‘payishi mumkinligini hisobga olib, Respublika maxsus komissiyasiga joylarga yana qo‘shimcha uskunalar yetkazish bo‘yicha topshiriq berildi.

O‘zbekiston Respublikasi Prezidentining 2020-yil 25-iyuldagi “Koronavirus pandemiyasini yumshatish, aholining sanitariya-epidemiologik osoyishtaligi va salomatligini saqlash tizimini tubdan takomillashtirish chora-tadbirlari to‘g‘risida”gi farmoniga muvofiq Sanitariya-epidemiologik osoyishtalik va jamoat salomatligi xizmati tashkil etildi.

Ta’kidlanishicha, ushbu xizmatning bugungi kundagi eng asosiy vazifasi virus zanjirini uzish hisoblanadi. Shuningdek, sog‘liqni saqlash tizimi, hokimliklar bilan birgalikda bemorlarni sog‘aytirish va ulardan boshqalarga virus yuqishini kamaytirish ham eng muhim yo‘nalishdir.

Yig‘ilishda yosh bolalar, homilador ayollar, keksalar, nogironligi va surunkali kasalligi bo‘lgan fuqarolar salomatligi ustidan tizimli monitoring olib borish muhimligi belgilandi.

Karantin davrida biror-bir ehtiyojmand oila e’tibordan chetda qolmasligi, kam ta’minlangan aholi qatlamiga moddiy yordam, oziq-ovqat va dori-darmonlarni manzilli yetkazib berish tizimi soatdek aniq ishlashi kerakligi ta’kidlandi.

“Hozirgi sharoitda kasallarni davolashga ham, iqtisodiyotni ishlatishga ham majbur va mas’ulmiz. Shuning uchun aholi salomatligini saqlash, ayni paytda temir intizom bilan hamma ishlarni davom ettirishimiz kerak”, — dedi Shavkat Mirziyoyev.

Hokimlar o‘z hududidagi real vaziyatdan kelib chiqib, aniq choralar ko‘rishi bo‘yicha topshiriqlar berildi. Shu bilan birga, tibbiy niqob taqish, ijtimoiy masofani saqlash, 65 yoshdan oshganlar zarurat bo‘lmasa, uydan chiqmasligi qoidalariga qat’iy rioya qilishning ahamiyati qayd etildi.

Eslatib o‘tamiz, Shavkat Mirziyoyev 27-iyul kuni Toshkent shahrida koronavirus pandemiyasiga qarshi kurashish, bu boradagi ishlarning samaradorligini, aholiga sifatli va o‘z vaqtida tibbiy yordam ko‘rsatish qamrovini oshirish bo‘yicha olib borilayotgan ishlar bilan tanishgandi.