Andijon viloyati Bo‘ston tumanida fuqarolarning o‘zaro janjali oqibatida ikki nafar fuqaro vafot etgan, bir nafar fuqaro tan jarohatlari bilan shifoxonaga yotqizilgan. Bu haqda O‘zbekiston Bosh prokuraturasi jamoatchilik bilan aloqalar va huquqiy axborot bo‘limi boshlig‘i Hayot Shamsuddinov “Daryo”ga ma’lum qildi.
Hodisa 13-iyul kuni soat 19:20 larda Bo‘ston tumanidagi “Sarbon” mahallasida yashovchi Z.T. o‘g‘illari O.K. va S.K. bilan ekin maydonini sug‘orish vaqtida suvni bir xil me’yorda kelishini nazorat qilish uchun ariq bo‘ylab “Yakkatol” mahallasi hududiga borganida sodir bo‘lgan. Ular shu mahallada yashovchi B.K. va uning akasi N.K. bilan o‘zaro suv talashib, janjallashishgan.
Janjal vaqtida fuqaro B.K. va uning akasi N.K. tomonidan S.K., O.K. va ularning otasi Z.T.ga o‘tkir tig‘li va to‘mtoq jismlardan turli jarohatlar yetkazilganligi aniqlangan.
Jumladan, fuqaro S.K.ning boshning ensa va chap chakka sohalarida qattiq o‘tmas jism bilan yetkazilgan 2 ta ochiq jarohat, o‘ng ko‘krak qafasining oldi yuzasida 5 ta, o‘ng qo‘ltiq ostida 3 ta jami 8 ta o‘tkir sanchuvchi-kesuvchi jismdan yetkazilgan.
O.K.ning o‘ng qoshida, bo‘yin oldi yuzasida, o‘ng qo‘ltiq ostida, ko‘krak qafasining orqa yuzasida 5 ta o‘tkir sanchuvchi-kesuvchi, chap ensa va burun suyaklarini sinishi, ikkala ko‘z qovoqlarida qontalashlar qattiq o‘tmas jism orqali yetkazilganligi, ko‘krak qafas chap va o‘ng tomonida bittadan, o‘rta qismida bitta jami 3 ta o‘tkir qirrali jism orqali yetkazilgan jarohatlar yetkazilgani aniqlangan.
Z.T.da esa o‘ng ko‘krak sohasida chetlari tekis kesib o‘tuvchi 4 ta jarohat, chap ko‘krak qafasi orqa yuzasida 4 ta, chap qovurg‘a ostida 7 ta o‘tkir tig‘li jismdan jami 15 ta jarohat aniqlangan.
Natijada fuqaro S.K. va O.K. olgan tan jarohatlari tufayli voqea joyida vafot etgan, ularning otasi Z.Tadjiboyev esa og‘ir tan jarohatlari bilan shifoxonaga yotqizilgan.
Mazkur holat yuzasidan Jinoyat Kodeksning 97-moddasi 2-qismi “a” bandi – javobgarlikni og‘irlashtiradigan holatlarda qasddan odam o‘ldirish, ya’ni ikki yoki undan ortiq shaxsni moddasi bilan jinoyat ishi qo‘zg‘atilgan. Shuningdek, fuqaro S.K. va O.K. o‘limi sabablari va Z.T.ning olgan tan jarohatlarining og‘irlik darajasini aniqlash maqsadida sud-tibbiy ekspertizalari va ish bo‘yicha sud-biologiya, daktoskopiya, kriminalistika ekspertizalari tayinlangan.
Dastlabki tergov davrida ishga aloqador bo‘lgan 12 nafar shaxslar guvoh tariqasida so‘roq qilinib, yuzlashtirish, ko‘rsatuvlarni hodisa sodir bo‘lgan joyda tekshirish tergov harakatlari o‘tkazilgan. Jinoyat ishi bo‘yicha B.K. tomonidan fuqarolar Z.T., O.K. va S.K.ga tan jarohati yetkazgan chalabzar pichog‘i ashyoviy dalil tariqasida olingan.
B.K. va N.K. gumon qilinuvchi tariqasida ishda ishtirok etishga jalb qilinib, Jinoyat-protsessual kodeksining 221-moddasida nazarda tutilgan ushlab turish asoslari tartibida ushlangan.
B.Kga nisbatan Jinoyat kodeksining 25-moddasi (Jinoyatga tayyorgarlik ko‘rish va jinoyat sodir etishga suiqasd qilish), 97-moddasi 2-qismi “a” “p” (Ikki yoki undan ortiq shaxsni bezorilik oqibatida javobgarlikni og‘irlashtiradigan holatlarda qasddan odam o‘ldirish) moddasi bilan ayblov e’lon qilingan.
N.K.ga esa Jinoyat kodeksining 25-moddasi (Jinoyatga tayyorgarlik ko‘rish va jinoyat sodir etishga suiqasd qilish), 28-moddasi (Jinoyat ishtirokchilarining turlari) va 97-moddasi 2-qismi “p” (Bezorilik oqibatida javobgarlikni og‘irlashtiradigan holatlarda qasddan odam o‘ldirish) moddasi bilan ayblov e’lon qilinib, qamoq ehtiyot chorasi qo‘llanilgan.
Hozirda jinoyat ishi bo‘yicha dastlabki tergov harakatlari viloyat prokuraturasining o‘ta og‘ir jinoyatlarni tergov qilish bo‘limi tomonidan o‘tkazilmoqda. Natijalar haqida qo‘shimcha axborot berib boriladi.
Avvalroq Andijonning Marhamat tumanida iyun oyida terak daraxtining soyasi sabab chiqqan nizo bir fuqaroning o‘limiga sabab bo‘lgani haqida xabar berilgan edi.
Izoh (0)