O‘zbekistonning 12-15 foiz yoki 4-5 million aholisi kambag‘allikda yashaydi. Bu haqda iqtisodiy taraqqiyot va kambag‘allikni qisqartirish vazirining birinchi o‘rinbosari Akmalxon Ortiqov ma’lum qildi.
Mavzuga doir: Shavkat Mirziyoyev: 4—5 million aholimiz kambag‘al, ularning kunlik daromadi 10—13 ming so‘mdan oshmayapti
Ta’kidlanishicha, yangi ish o‘rinlari yaratishni qo‘llab-quvvatlash orqali aholi daromadini oshirish va kambag‘allikni qisqartirish masalalariga alohida e’tibor qaratilib, Iqtisodiyot va sanoat vazirligi Iqtisodiy taraqqiyot va kambag‘allikni qisqartirish vazirligi sifatida qayta tashkil etildi.
Qayd etilishicha, aholining nochor qismiga ko‘mak berish maqsadida kompleks va hududiy dasturlar ishlab chiqilgan, vazirlar, hokimlar va sektorlar rahbarlarining vazifalari belgilab berilgan. Lekin pandemiya ko‘p sohalarda ish o‘rinlarini yaratishga, kambag‘allikka qarshi kurashishga katta ta’sir ko‘rsatmoqda.
Pandemiyaning ta’sirini yumshatish maqsadida “Saxovat va ko‘mak” umumxalq harakati yo‘lga qo‘yildi. Uning doirasida karantin davrida ijtimoiy himoyaga muhtoj, ko‘p bolali oilalarga, yolg‘iz va nogironligi bor shaxslarga hamda o‘z daromadini yo‘qotgan vaqtincha ishsiz bo‘lgan 321 mingga yaqin oilaga 127,7 milliard so‘mdan ziyod mablag‘ sarflangan.
Mavzuga doir: Koronavirus pandemiyasi O‘zbekistonda 450 mingga yaqin oilaning daromadiga jiddiy ta’sir qilishi mumkin
Joriy yilning iyul—oktabr oylarida muhtoj oilalarning yana 257 mingga yaqin mehnatga layoqatli qismini daromad manbai bilan ta’minlash rejalashtirilmoqda.
Vazir o‘rinbosarining bildirishicha, 8-iyul kuni Prezident raisligida o‘tkazilgan videoselektor yig‘ilishida kambag‘allikni kamaytirish bo‘yicha olib borilayotgan ishlar ham muhokama qilindi. Davlat rahbari kamida 257 ming nafar muhtoj oila vakillarini ishga joylashtirish, 37 mingta xonadonga oilaviy tadbirkorlik dasturlari doirasida kreditlar ajratish zarurligini qayd etdi.
Ehtiyojmand aholini ishga joylashtirish ko‘rsatkichi eng past sektorlar ta’kidlanar ekan, ularning rahbarlariga jazo choralari ko‘rildi. Jumladan, Farg‘ona tumani hokimi, Yakkabog‘ tumani prokurori, G‘uzor va Chortoq tumanlari ichki ishlar boshqarmalari boshliqlari, Muborak tumani va Qo‘qon shahar soliq inspeksiyalari boshliqlarini egallab turgan lavozimlaridan ozod etish bo‘yicha topshiriqlar berildi.
Akmalxon Ortiqovning ma’lum qilishicha, O‘zbekistonda kambag‘allikni qisqartirishning 2030-yilgacha strategiyasi va konsepsiyasi tayyorlanmoqda. Unda kambag‘allik tushunchasi, uni aniqlash mezonlari va baholash usullari, ijtimoiy ta’minotning minimal standartlari, ta’lim, sog‘liqni saqlash, uy-joy ta’minoti va tadbirkorlikni rivojlantirish orqali kambag‘allikni qisqartirish bo‘yicha ilg‘or xorijiy tajriba, xususan, Xitoy tajribasidan foydalanish ko‘zda tutilgan.
Izoh (0)