Buxoro viloyatida pandemiya sharoitida davlatdan imtiyozli un xarid qilganiga qaramasdan iste’molchilar haqiga xiyonat qilgan va tarozidan urib kelayotgan non ishlab chiqaruvchilar borligi ma’lum bo‘ldi. Bu haqda “Daryo”ga Bosh prokuraturasi huzuridagi Iqtisodiy jinoyatlarga qarshi kurashish departamenti viloyat boshqarmasi axborot xizmati xabar berdi.
Buxoro shahridagi “Oltin boshoq” MChJ da o‘tkazilgan reydda korxona sertifikatida har bir qolipli non og‘irligi 500 grammni tashkil etishi alohida ko‘rsatib qo‘yilgan bo‘lsa-da, nonning og‘irligi aslida 475 gramm ekanligi aniqlangan. O‘rganilishicha, mazkur korxona bir oyda 26 tonna unni arzonlashtirilgan narxda sotib olgan.
Xuddi shuningdek, “Oybek bruschatki” MChJ rahbarligidagi non ishlab chiqarish sexi o‘rganilganda ishlab chiqarishda sanitariya qoidalariga e’tibor qaratilmagani, tayyorlangan xamirning ochiq holatidaligi hamda xodimlarning maxsus kiyim-boshsiz, tozalikka rioya qilmagan holatda faoliyat ko‘rsatayotgani aniqlangan. Shuningdek, 600 gramm bo‘lishi belgilangan non 450 grammligi ayon bo‘lgan. Ushbu non korxonasi ham 13 tonna unni imtiyozli narxda xarid qilgani oydinlashgan.
“Mastorum sarkor” MChJda, Peshku tumanidagi “Bog‘i Muso shirin noni” korxonasida ham iste’molchilar haqiga xiyonat qilingani aniqlangan.
Peshkudagi “Non va mazali shirinliklar” oilaviy korxonasi 3 tonna imtiyozli narxdagi un mahsulotini qayta ishlab, kuniga 500 donagacha non ishlab chiqargan va 450 grammli nonni 1500 so‘mdan sotgan.
Reyd davomida Olot tumanidagi “Komil tashabbus” xususiy korxonasi, Romitan tumanidagi “Shirmoy non” MChJlarda ham xuddi shunday kamchiliklarga yo‘l qo‘yilayotgani aniqlangan. “Vobkent non va qandolatlari” xususiy korxonasi har oy 15 tonna unni imtiyozli xarid qilib, sifatli non ishlab chiqarib kelsa-da, tarozi pallasini shaxsiy manfaatga “sozlab” qo‘yilgani aniqlangan.
G‘ijduvon tumanidagi “Mushtariybegim Maftuna orzusi” MChJ imtiyozli tartibda har oy 20 tonna un olib, aholiga har donasining og‘irligi 350 gramm bo‘lgan non yetkazayotgani oshkor bo‘lgan
Iqtisodiy jinoyatlarga qarshi kurashish departamenti viloyat boshqarmasi mas’uliga ko‘ra, o‘rganishlar yakunida har bir xususiy korxona egasi jiddiy ogohlantirilgan. Qonunbuzarlik yana takrorlansa, ularga nisbatan tegishli qonuniy chora ko‘rish bildirilgan.
Ta’kidlash lozimki, Buxoro viloyat hokimi vazifasini bajaruvchi Karim Kamolov aholiga murojaatida viloyatda non mahsulotlari narxi oshishining oldini olish maqsadida 532 ta korxona 7254 tonna un mahsuloti bilan ta’minlangani, jumladan, 240 ta qolipli non ishlab chiqaruvchi korxonaga 2831 tonna, 284 ta chakana savdo korxonasiga 4386 tonna va 8 ta makaron ishlab chiqaruvchi korxonaga esa 37 tonna un yetkazilgani haqida ma’lumot bergandi.
Izoh (0)