Тошкент вилоятида коронавирус инфекцияси тарқалишининг олдини олиш тадбирларига 63,4 миллиард сўм маблағ ажратилган. Бу ҳақда вилоят ҳокимлиги ахборот хизматига таяниб «Kun.uz» хабар берди.
Қайд этилишича, маҳаллий бюджетнинг қўшимча манбалари ҳисобидан 28,4 миллиард сўм ажратилган. Шундан 4,9 миллиард сўм санитария-эпидемиология осойишталик маркази, 20,8 миллиард сўм – вилоят соғлиқни сақлаш бошқармасига, 2,78 миллиард сўм эса тиббиёт ходимларининг 6 фоизлик мукофот пуллари учун сарфланган.
Бундан ташқари, Инқирозга қарши курашиш жамғармасидан 36,5 миллиард сўм карантин объектларида фаолиятни ташкил этиш учун ажратилган. Жумладан, 3,7 миллиард сўм озиқ-овқатга, 500 миллион сўм бир марта ишлатиладиган идишларга, 1,8 миллиард сўм дори-дармон воситаларига кетган.
«24 апрелдаги Президент фармони ижросини таъминлаш мақсадида санитария-эпидемиология осойишталик маркази ходимларининг иш ҳақи миқдорини ошириш учун 2,2 миллиард сўм, эпидемияга қарши кураш тадбирларида қатнашган 5905 нафар тиббиёт ва бошқа ходимларни моддий рағбатлантириш учун 19 миллиард сўм маблағ ажратилган.
Карантин муассасаларида 14 кунлик иш жараёнида қатнашган 392 нафар ходимга қўшимча рағбатлантириш сифатида 9,1 миллиард сўм маблағ ажратилган», – дейилади хабарда.
27 июлда Ўзбекистон адлия органлари коронавирус пандемияси шароитида тиббиёт ходимларига кунлик қўшимча ва рағбатлантирувчи тўловларнинг тўланиши бўйича мониторинг ўтказгани хабар қилинган, унга кўра Тошкент вилоятида 23 миллион сўм миқдоридаги маблағ тўлаб берилмагани ойдинлашганди.
Айни пайтда Тошкент вилоятида коронавирусга чалинган 1074 нафар бемор — 794 нафари уй шароитида, 280 нафари эса стационар шароитда даволанмоқда. Стационар шароитда даволанаётганларнинг 87 нафари Зангиота туман юқумли касалликлар шифохонасида, 115 нафари Олмалиқ шаҳар юқумли касалликлар шифохонасида, 58 нафари Қибрай тумани марказий касалхонасида, 20 нафари эса республика мақомидаги тиббиёт муассасаларида муолажа олмоқда.
Вилоят соғлиқни сақлаш бошқармасининг берган маълумотларга кўра, касалланганларнинг 4 нафарининг ҳолати ўта оғир, 11 нафари оғир, 46 нафари ўрта, 219 нафари қониқарли аҳволда. Аломатларсиз уй шароитида даволанаётганлар 794 нафарни, пневмония ҳолатидагилар 69 нафарни ташкил этади.
Изоҳ (0)