Qoraqalpog‘istondagi “Makan.uz”, “Kruz.uz” va “Kar24.uz” nashrlarining bosh muharrirlari “Repost.uz”ning Qoraqalpog‘iston Jo‘qorg‘i Kengesi raisi, O‘zbekiston Senati raisi o‘rinbosari Musa Yerniyazov vafot etgani (u hozirgi vaqtda koronavirusdan davolanmoqda) haqidagi xabarlarini qayta chop etganidan so‘ng prokuraturaga chaqirilgani haqida xabar berilgan edi. O‘zbekiston bosh prokurorining o‘rinbosari Svetlana Ortiqova bu holat bo‘yicha qoraqalpog‘istonlik hamkasblariga tanbeh berdi. Bu haqda “Xabar.uz” ma’lum qildi.
Nashrning yozishicha, Svetlana Ortiqova qoraqalpog‘istonlik jurnalistlar bilan sodir bo‘lgan voqeaga o‘z munosabatini bildirgan.
“Kecha shu masalada Qoraqalpog‘iston prokurori bilan gaplashdim. Vaziyatni muhokama qilish jarayonida holat yuzasidan surishtiruv o‘tkazgan xodimlarning xatti-harakatini oqlab bo‘lmasligi aytib, ularga qattiq tanbeh berdim. Qoraqalpog‘istonlik ayrim hamkasblarim kechaning o‘zida mahalliy jurnalistlardan uzr so‘ragan”, — deya ma’lum qilgan bosh prokuror o‘rinbosari.
Svetlana Ortiqovaning so‘zlariga ko‘ra, ayni paytda o‘sha xodimlarning xatti-harakatlari o‘rganilmoqda, natijasiga qarab tegishli chora ko‘riladi.
Shuningdek, Svetlana Ortiqova nashrlar tomonidan noto‘g‘ri axborot tarqatganlik holati “yopilib ketmasligini” aytdi. Hozirgi kunda mazkur holat yuzasidan Qoraqalpog‘iston Respublikasi IIV tomonidan tergovga qadar tekshirish harakatlari olib borilmoqda.
Izoh (0)