“Keyingi yildan davlat xizmati organlari xodimlari tanlov asosida va nepotizmga yo‘l qo‘ymagan holda ishga olinadi” – Bandlik va mehnat munosabatlari vazirining birinchi o‘rinbosari

2020-yil 20-iyul kuni Xalqaro press-klubning koronavirusga qarshi kurash va pandemiya davrida aholini qo‘llab-quvvatlash bo‘yicha amalga oshirilayotgan chora-tadbirlar muhokamasiga bag‘ishlangan navbatdagi sessiyasi bo‘lib o‘tdi. Unda hukumat va bir qator vazirlik vakillari ishtirok etdi, deya xabar bermoqda “Daryo” muxbiri Mirolim Isajonov.

Tadbirda Xalqaro press-klub raisi Sherzodxon Qudratxo‘jaev Bandlik va mehnat munosabatlari vazirining birinchi o‘rinbosari Erkin Muhitdinovga “Bo‘sh ish o‘rinlari uchun erkin tanlov o‘tkazish tizimi qachon paydo bo‘ladi?”, degan savol bilan yuzlandi. Muhitdinov esa shunday javob qaytardi:

“Bu bo‘yicha ishlar boshlangan. Albatta, bu yerda davlat xizmati xodimlari uchun bo‘sh ish o‘rni erkin tizimi haqida gap ketyapti. Bu ko‘proq “Davlat xizmatlari to‘g‘risida”gi qonunga bog‘liqligi bois jarayon biroz kechikdi.

Lekin bu yildan eksperiment tariqasida bizning vazirlik davlat xizmatlarini rivojlantirish agentligi bilan birgalikda “Xalq banki“ va 11 ta tumanda davlat organlariga ishchi olishda erkin yollash tizimini joriy etdi. Misol uchun aytishim mumkinki, Bandlik va mehnat munosabatlari vazirligi huzuridagi davlat mehnat inspeksiyasi xodimlarini erkin yollash tizimi orqali ishga olish boshlandi va bu jarayon davom etyapti.

Ikkinchi bosqich uchun shunday reja qilinyaptiki, keyingi yildan barcha hududlarda va hamma tarmoqlarda davlat xizmati organlari xodimlari erkin yollash tizimi orqali tanlov asosida va nepotizmga yo‘l qo‘ymagan holda ishga olinadi”, — dedi vazirlik rasmiysi.