2020 йил 20 июль куни Халқаро пресс-клубнинг коронавирусга қарши кураш ва пандемия даврида аҳолини қўллаб-қувватлаш бўйича амалга оширилаётган чора-тадбирлар муҳокамасига бағишланган навбатдаги сессияси бўлиб ўтди. Унда ҳукумат ва бир қатор вазирлик вакиллари иштирок этди, дея хабар бермоқда «Дарё» мухбири Миролим Исажонов.
Тадбирда Халқаро пресс-клуб раиси Шерзодхон Қудратхўжаэв Бандлик ва меҳнат муносабатлари вазирининг биринчи ўринбосари Эркин Муҳитдиновга «Бўш иш ўринлари учун эркин танлов ўтказиш тизими қачон пайдо бўлади?», деган савол билан юзланди. Муҳитдинов эса шундай жавоб қайтарди:
«Бу бўйича ишлар бошланган. Албатта, бу ерда давлат хизмати ходимлари учун бўш иш ўрни эркин тизими ҳақида гап кетяпти. Бу кўпроқ «Давлат хизматлари тўғрисида»ги қонунга боғлиқлиги боис жараён бироз кечикди.
Лекин бу йилдан эксперимент тариқасида бизнинг вазирлик давлат хизматларини ривожлантириш агентлиги билан биргаликда «Халқ банки« ва 11 та туманда давлат органларига ишчи олишда эркин ёллаш тизимини жорий этди. Мисол учун айтишим мумкинки, Бандлик ва меҳнат муносабатлари вазирлиги ҳузуридаги давлат меҳнат инспекцияси ходимларини эркин ёллаш тизими орқали ишга олиш бошланди ва бу жараён давом этяпти.
Иккинчи босқич учун шундай режа қилиняптики, кейинги йилдан барча ҳудудларда ва ҳамма тармоқларда давлат хизмати органлари ходимлари эркин ёллаш тизими орқали танлов асосида ва непотизмга йўл қўймаган ҳолда ишга олинади», — деди вазирлик расмийси.
Изоҳ (0)